لاہور ہائیکورٹ کے چیف جسٹس ملک شہزاد احمد خان نے جمعہ کو لاہور ہائیکورٹ راولپنڈی بنچ کا دورہ کیا۔
جاری پریس ریلیز کے مطابق چیف جسٹس کی آمد پر سینئر جج جسٹس شجاعت علی خان، جسٹس صداقت علی خان، جسٹس مرزا وقاص رؤف اور جسٹس چوہدری عبدالعزیز نے پرتپاک استقبال کیا اور انہیں پھولوں کا گلدستہ پیش کیا۔ . اس موقع پر پولیس کے چاق و چوبند دستے نے چیف جسٹس کو گارڈ آف آنر بھی پیش کیا۔
چیف جسٹس نے راولپنڈی بنچ کے ججز کے ساتھ اجلاس کی صدارت کی اور راولپنڈی بنچ اور راولپنڈی ڈویژن کی ضلعی عدالتوں میں مقدمات کو جلد نمٹانے سے متعلق مختلف امور پر تبادلہ خیال کیا۔ اجلاس میں زیر التواء مقدمات کی سماعت میں تیزی لانے اور فریقین کو فوری انصاف کی فراہمی کو یقینی بنانے کے اقدامات کی نشاندہی پر توجہ مرکوز کی گئی۔ چیف جسٹس نے ضلعی عدلیہ کی کارکردگی کا بھی جائزہ لیا اور ججز کو ہدایت کی کہ وہ اپنی کارکردگی کو بہتر بنانے کے لیے تمام ضروری اقدامات کریں۔
