آئی ایس پی آر نے اپنے بیان میں کہا ہے کہ خیبرپختونخوا میں 24 اور 25 جنوری کو سکیورٹی فورسز نے خفیہ اطلاع پر تین الگ الگ کامیاب آپریشنز کئے ،جس میں 30 دہشت گرد ہلاک اور 8 زخمی ہوگئے ۔
پاک فوج کے شعبہ تعلقات عامہ کے مطابق دہشت گردوں کی موجودگی کی اطلاع پر سکیورٹی فورسز نے پہلی کارروائی ضلع لکی مروت میں انٹیلی جنس بنیاد پر کی جس میں 18 دہشت گرد ہلاک جبکہ 6 زخمی ہوئے ۔
آئی ایس پی آر کے مطابق دوسری کارروائی بھی خفیہ اطلاع پر ضلع کرک میں کی گئی جس میں 8 دہشت گردوں کو ہلاک کيا گیا ۔
آئی ایس پی آر کے مطابق تيسري کارروائی ضلع خیبر کے علاقے باغ میں کی گئی جس ميں دہشت گرد رہنما عزیز الرحمان عرف قاری اسماعیل اور دہشت گرد مخلص سمیت 4 دہشت گرد ہلاک جبکہ دو زخمی ہوئے ہیں ۔
ہلاک دہشت گردوں کے قبضے سے اسلحہ اور گولہ بارود بھی برآمد ہوا، یہ دہشت گرد سکیورٹی فورسز کے خلاف دہشت گردی کی کارروائیوں کے علاوہ معصوم شہریوں کے قتل میں بھی ملوث تھے ۔
آئی ایس پی آر نے مزید کہا ہے کہ علاقے میں پائے جانے والے کسی اور دہشت گرد کی تلاش کے لیے سینی ٹائزیشن آپریشن جاری ہے، پاکستان کی سکیورٹی فورسز ملک سے دہشت گردی کی لعنت کو ختم کرنے کے لیے پُرعزم ہیں ۔
دوسری جانب وزیراعظم شہبازشریف کی جانب سے کامیاب کارروائیوں پر سکیورٹی فورسز کو خراج تحسین پیش کیا گیا، وزیر اعظم کا کہنا تھا کہ دہشت گردی کے خلاف جنگ میں پوری قوم سکیورٹی فورسز کیساتھ کھڑی ہے اور ملک سے ہر قسم کی دہشت گردی کے مکمل خاتمے کے لئے پُرعزم ہیں ۔
