اسلام آباد: وفاقی وزیر بحری امور محمد جنید انوار چوہدری نے کہا ہے کہ کراچی اور یورپ کی بڑی بندرگاہوں کے درمیان براہ راست شپنگ رابطہ بحال کر دیا گیا ہے۔
اس سے طویل سفری دورانیے اور اضافی مال برداری اخراجات کا سامنا کرنے والے برآمدکنندگان کو ریلیف ملے گا۔
انہوں نے کہا کہ برآمدکنندگان کیلئے میڈیٹیرینین شپنگ کمپنی نے اپنی پریمیم آئی پاک سروس دوبارہ شروع کر دی ہے۔
جس کے تحت کراچی سے یورپ کیلئے ہفتہ وار براہ راست شپنگ رابطہ فراہم کیا جائے گا۔
وزیر بحری امور کے مطابق ایم ایس سی کا جہاز کراچی گیٹ وے ٹرمینل انٹرنیشنل پر ہر ہفتے لنگر انداز ہوگا۔
کولمبو کے راستے یورپ کی اہم بندرگاہوں فیلکس اسٹو، روٹرڈیم، ہیمبرگ، بریمر ہیون، اینٹورپ، لے ہاور اور لندن گیٹ وے سے منسلک ہوگا۔
محمد جنید انوار چوہدری نے کہا کہ یورپ کیلئے مخصوص شپنگ سروس کی بحالی برآمدی صنعت، بالخصوص ٹیکسٹائل کے شعبے کیلئے اہم پیش رفت ہے۔
انہوں نے بتایا کہ ٹیکسٹائل برآمدکنندگان نے حال ہی میں شپنگ روٹس میں تبدیلی، خصوصاً بحیرہ احمر کی صورتحال کے باعث پیدا ہونے والی مشکلات سے آگاہ کیا تھا۔
وفاقی وزیر نے کہا کہ قابل اعتماد اور مستقل شپنگ رابطے پاکستان کے برآمدکنندگان کیلئے انتہائی اہم ہیں۔
حکومت کی کوشش ہے کہ بحری شعبہ تجارت کو مؤثر معاونت فراہم کرے۔
لاجسٹکس کی رکاوٹیں کم ہوں اور عالمی منڈیوں تک پاکستان کی رسائی مزید بہتر بنائی جائے۔
وزیر بحری امور نے کہا کہ حکومت شپنگ صنعت اور برآمدکنندگان کے ساتھ مل کر رابطوں اور لاجسٹکس سے متعلق مسائل کے حل کیلئے اقدامات جاری رکھے گی۔
حکومت کا مقصد بندرگاہوں اور شپنگ خدمات کو مزید بہتر بنا کر ایک مؤثر بحری لاجسٹکس نظام تشکیل دینا اور عالمی تجارت میں پاکستان کی مسابقتی حیثیت مضبوط کرنا ہے۔
