کوہستان کرپشن اسکینڈل میں ملوث ایک اور اہم ملزم امیر زیب کو ایبٹ آباد سے گرفتار کر لیا گیا ہے۔ نیب حکام کے مطابق گرفتار ملزم کا تعلق جمعیت علماء اسلام سے ہے۔
ملزم امیر زیب کو نیب عدالت میں پیش کیا گیا، عدالت نے اسے 10 روزہ جسمانی ریمانڈ پر قومی احتساب بیورو کے حوالے کردیا۔ نیب کا کہنا ہے کہ تفتیش کے دوران ملزم کے بینک اکاؤنٹ میں 35 کروڑ 72 لاکھ روپے سے زائد کی مشکوک رقوم منتقل ہونے کا انکشاف ہوا ہے۔
نیب حکام کے مطابق ملزم سے مزید تفتیش جاری ہیں اور اسے دوبارہ 27 جنوری کو نیب عدالت میں پیش کیا جائے گا۔ کوہستان کرپشن اسکینڈل میں مزید گرفتاریوں کا بھی امکان ظاہر کیا جا رہا ہے۔
