پاکستان نے گلگت بلتستان میں ہونے والے عام انتخابات کے حوالے سے بھارت کے بے بنیاد بیانات مسترد کرديئے، دفتر خارجہ کا کہنا ہے کہ بھارت جھوٹی کہانیوں اور گمراہ کن پروپیگنڈے کے فروغ میں عالمی شہرت رکھتا ہے ۔
اسلام آباد: ترجمان دفتر خارجہ طاہر اندرابی نے اپنے ایک بیان میں کہا ہے کہ بھارت جھوٹی کہانیوں اور گمراہ کن پروپیگنڈے کے فروغ میں عالمی شہرت رکھتا ہے، گلگت بلتستان سے متعلق بھارتی دعوے حقائق کو مسخ کرنے کی کوشش ہیں ۔
ترجمان کے مطابقجموں و کشمیر بین الاقوامی سطح پر تسلیم شدہ متنازع علاقہ ہے، مسئلہ کشمیر سلامتی کونسل کے ایجنڈے کا طویل ترین غیر حل شدہ تنازع ہے ۔
دفتر خارجہ کے ترجمان نے مزید بتایا کہ کشمیر تنازع کا منصفانہ حل اقوام متحدہ کی قراردادوں پر عملدرآمد میں ہے، کشمیریوں کو آزادانہ اور غیر جانبدارانہ استصوابِ رائے کا حق ملنا چاہیے ۔
انہوں نے کہا کہ بھارت کے زیر انتظام کشمیر میں انسانی حقوق کی سنگین خلاف ورزیاں جاری ہیں، بھارتی فورسز کو سخت قوانین کے تحت حاصل استثنیٰ تشویشناک ہے ۔
ترجمان دفتر خارجہ نے مطالبہ کیا کہ بھارت مقبوضہ علاقوں سے انخلا کرے، 5 اگست 2019 کے اقدامات واپس لے اور بین الاقوامی مبصرین، انسانی حقوق تنظیموں اور میڈیا کو مقبوضہ کشمیر میں رسائی دے ۔
