ٹی 20 ورلڈ کپ کے گروپ میچ میں بھارت نے ایک بار پھر پاکستانی ٹیم کو شکست دے دی، 176 رنز ہدف کے تعاقب میں قومی ٹیم 18 اوورز میں 114 رنز پر آؤٹ ہوگئی اور یوں بھارت نے میچ 61 رنز سے جیت لیا ۔
سری لنکا کے کولمبو کرکٹ سٹیڈیم میں کھیلے گئے ٹی ٹوئنٹی ورلڈ کپ کے 27ویں میچ میں پاکستان کے کپتان سلمان علی آغا نے ٹاس جیت کر پہلے فیلڈنگ کا فیصلہ کیا ۔
بھارتی ٹیم نے مقررہ اوورز میں 7 وکٹوں کے نقصان پر 175 رنز بنائے ، جن میں ایشان کشن نے سب سے زیادہ 77 رنز اسکور کیے،دیگر بھارتی بلے بازوں میں کپتان سوریا کمار یادیو 32، شیوام دوبے 27، تلک ورما 25 رنز بنا سکے، جبکہ ابھیشک شرما اور ہاردیک پانڈیا صفر پر آؤٹ ہوئے ۔
پاکستان کی جانب سے صائم ایوب نے 3 ، سلمان علی آغا، شاہین شاہ آفریدی اور عثمان طارق نے ایک، ایک وکٹ حاصل کی، ہدف کے تعاقب میں پاکستان کی پوری ٹیم 18 اوورز میں صرف 114 رنز بنا کر آؤٹ ہوگئی اور 61 رنز سے میچ ہار گئی۔ پاکستان کی طرف سے عثمان خان نے 44 اور شاہین شاہ آفریدی نے 23 رنز بنائے ۔
دیگر قومی بیٹرز بھارت کے خلاف ایک بار پھر ناکام رہے، صاحبزادہ فرحان صفر، صائم ایوب 6، کپتان سلمان آغا 4، بابر اعظم 5، شاداب خان 14، محمد نواز 4، فہیم اشرف 10 رنز بنا کر آؤٹ ہوئے، جبکہ ابرار احمد اور عثمان طارق صفر پر پویلین لوٹ گئے ۔
بھارت کی جانب سے ہاردیک پانڈیا، جسپرٹ بمراہ، ایکشر پٹیل اور ورون چکرورتی نے دو، دو وکٹیں حاصل کیں۔شاندار 77 رنز بنانے پر ایشان کشن کو میچ کا بہترین کھلاڑی قرار دیا گیا ۔
پاکستان کے خلاف فتح کے بعد بھارت میگا ایونٹ کے سپر ایٹ مرحلے میں پہنچ گیا جبکہ قومی ٹیم کو اگلے مرحلے میں رسائی کے لیے 18 فروری کو نمیبیا کے خلاف میچ جیتنا ہوگا ۔
میچ سے قبل کولمبو میں پاک بھارت میچ سے قبل پی سی بی چیئرمین محسن نقوی نے کرکٹ ٹیم کے کھلاڑیوں اور مینجمنٹ سے ملاقات کی ۔
چیئرمین پی سی بی محسن نقوی نے کھلاڑیوں کی حوصلہ افزائی کی، ان کے عزم اور جذبے کو سراہا اور قومی کرکٹ ٹیم کے لیے نیک خواہشات کا اظہار کیا ۔
ملاقات میں کپتان سلمان علی آغا، ہیڈ کوچ مائیک ہیسن، منیجر نوید اکرم چیمہ، تمام کھلاڑی اور کوچنگ اسٹاف موجود تھے۔ اس موقع پر پی سی بی کے چیف آپریٹنگ آفیسر سمیر احمد، پی ایس ایل کے چیف ایگزیکٹو آفیسر سلمان نصیر اور میڈیا ڈائریکٹر عامر میر بھی شریک تھے ۔
