مانسہرہ کے علاقوں ترنین اور کلگان سبزی منڈی کے قریب غیرت کے نام پر فائرنگ کر کے ایک خاتون اور ایک مرد کو قتل کر دیا گیا ہے، پولیس نے مقتولہ کے شوہر سعید جان نامی ملزم کے خلاف دوہرے قتل کے الگ الگ مقدمات درج کر کے تفتیش کا آغاز کر دیا ہے ۔
پانسہرہ: تھانہ شنکیاری میں درج ایف آئی آر میں مقتولہ کے بھائی سعید الرحمان نے بتایا کہ ان کی بہن ، جو ملزم سعید جان کی اہلیہ تھی، کو اس کے شوہر نے غیرت کے نام پر گولیاں مار کر قتل کیا ۔
دوسری جانب، تھانہ بفہ میں مقتول آفتاب کے بھائی سرازر نے رپورٹ درج کرواتے ہوئے مؤقف اختیار کیا کہ اس کا بھائی کسی کام سے گھر سے نکلا تھا، جسے کلگان سبزی منڈی کے قریب کھیتوں میں ملزم سعید جان نے مبینہ طور پر غیرت ہی کے نام پر قتل کر دیا ۔
پولیس نے واقعے کے بعد جائے وقوعہ سے شواہد اکٹھے کر لیے اور ملزم کی گرفتاری کے لیے چھاپے مارے جا رہے ہیں۔ علاقے میں اس واقعے کے بعد خوف و ہراس پھیل گیا ہے ۔
پولیس حکام کا کہنا ہے کہ واقعے کی تفتیش شروع کردی گئی ہے ،قانون کو ہاتھ میں لینے والوں کے خلاف سخت کارروائی عمل میں لائی جائے گی ۔
