ہنزہ ،اسکردو، دیامر،لوئر دیر، ایبٹ آباد ،مری اور گلیات میں شدید برفباری سے متعدد رابطہ سڑکیں بند ہوگئیں۔
دوسری جانب سوات کے میدانی علاقوں میں بارش جبکہ بالائی علاقوں میں برفباری کا سلسلہ جاری ہے۔ سوات کے بالائی علاقوں ملم جبہ، کالام، اتروڑ اور گبرال میں وقفے وقفے سے برفباری کا سلسلہ جاری ہے جس کے باعث بالائی علاقے شدید سردی کے لپیٹ میں ہیں۔
شدید برفباری کے باعث کالام مہوڈھنڈ روڈ آمدو رفت کیلئے بند ہو گیا ہے، جس کے باعث مقامی لوگوں کو مشکلات کا سامنا ہے۔ ملکہ کوہسار مری میں بارش اور برفباری کا سلسلہ وقفے وقفے سے جاری ہے۔ مال روڈ، کشمیر پوائنٹ، کلڈنہ، جھیکا گلی، کالی مٹی سمیت دیگر مقامات پر بارش اور برفباری سے سردی میں اضافہ ہوگیا۔
ڈپٹی کمشنر مری آغا ظہیر عباس کا کہنا ہے کہ انتظامیہ کی جانب سے مختلف شاہراہوں پر نمک کا چھڑکاؤ کیا جا رہا ہے، سیاحوں کی مدد اور رہنمائی کے لیے سہولت مراکز مکمل طور پر فعال ہیں۔
ادھر لوئردیر کے شہری علاقوں میں بارش اور پہاڑوں پر برفباری ایک بار پھر شروع ہوگئی ہے۔ جبکہ آزادکشیر میں اپرنیلم، لوات بالا اور شاردہ میں بھی برفباری ہوئی۔ جاگراں ویلی میں گلیشیئر کی زد میں آنے سے درجنوں مکانات کو نقصان پہنچا۔
