مانسہرہ میں بیدرہ انٹر چینج پر ایک کار کے مسافروں نے اہلکاروں پر فائرنگ کر دی جس کے نتیجے میں ایک پولیس اہلکار ہلاک اور دو دیگر زخمی ہو گئے۔
پولیس کا کہنا ہے کہ یہ واقعہ پشاور سے مانسہرہ جانے والے کار ڈرائیور کو ہائی وے پولیس کی جانب سے چالان جاری کرنے پر جھگڑے کے دوران پیش آیا۔ مانسہرہ کے ڈسٹرکٹ پولیس آفیسر (ڈی پی او) شفیع اللہ گنڈا پور کے مطابق فائرنگ کے بعد آس پاس کے علاقوں کو گھیرے میں لے کر مشتبہ افراد کی گرفتاری کے لیے سرچ آپریشن شروع کر دیا گیا ہے۔شہید اہلکار کی شناخت عامر خان سواتی کے نام سے ہوئی ہے۔ واضح رہے کہ گزشتہ دنوں موٹروے پولیس پر تشدد کے ایسے ہی واقعات سامنے آئے ہیں۔
