وزیراعظم آزاد کشمیرفیصل ممتاز راٹھور نے کہا کہ زراعت اور لائیو اسٹاک کا شعبہ ریاست کی معیشت میں ریڑھ کی ہڈی کی حیثیت رکھتا ہے ۔
مظفرآباد: وزیراعظم آزاد کشمیر فیصل ممتاز راٹھور کی زیر صدارت اجلاس ہوا جس میں آئندہ دنوں میں منعقد ہونے والی زرعی کانفرنس کے حوالے سے وزیراعظم کو تفصیلی بریفنگ دی گئی ۔
وزیراعظم آزاد کشمیر کو کانفرنس کے اغراض و مقاصد، تیاریوں اور انتظامات سے آگاہ کیا گیا جبکہ مجوزہ ایجنڈے، شرکت کرنے والے ماہرین اور مختلف سیشنز کے بارے میں بھی بریفنگ دی گئی ۔
اس موقع پر خطاب کرتے ہوئے وزیراعظم آزاد کشمیر نے کہا کہ اپریل کے وسط میں منعقد ہونے والی زرعی کانفرنس کا مقصد زمینداروں کو خود کفیل بنانا اور اس شعبے کی ترقی کو ترجیح دینا ہے ۔
انہوں نے کہا کہ زراعت کو منافع بخش کاروبار بنانے کے لیے جدید تقاضوں کے مطابق اقدامات اٹھانا ناگزیر ہیں، زرعی کانفرنس ایک اہم پلیٹ فارم ثابت ہوگی جہاں ماہرین، پالیسی ساز اور کاشتکار ایک جگہ جمع ہو کر درپیش چیلنجز اور ان کے حل کے لیے مؤثر روڈ میپ ترتیب دیں گے ۔
