فلسطین کے رہائشی علاقوں پر اسرائیلی فوج کےحملے جاری ہیں، گزشتہ 24 گھنٹوں میں مزید 200 سے زائد فلسطینی شہید ہوچکے ہیں جبکہ شہدا کی تعداد 21 ہزار سے متجاوز ہو گئی۔
اسرائیل کی فوج نے بھیانک جنگی جرائم کی انتہا کرتے ہوئے لاشوں سے اعضا بھی چُرا لیے، 80 سے زائد مسخ شدہ لاشوں کی رفح میں اجتماعی تدفین کردی گئی۔ میڈیا رپورٹ کے مطابق وسطی غزہ میں العمل اسپتال کے قریب اسرائیلی بمباری سے 20 فلسطینی شہید ہوئے جبکہ نصیرات کے پناہ گزین کیمپ پر صیہونی حملے میں بھی کئی افراد کی شہادتوں کی اطلاعات ہیں۔
جبکہ جنوبی غزہ میں رفح میں اسرائیلی حملے کے بعد علاقے میں آگ بھڑک اٹھی جبکہ نصیرات کیمپ میں 7 اور المغازی کیمپ پر حملے میں مزید 20 فلسطینیوں کو شہید کردیا گیا۔ یاد رہے کہ غزہ میں 7 اکتوبر سے اب تک شہید ہونے والے فلسطینیوں کی تعداد 21 ہزار 110 سے متجاوز ہو چکی ہے جبکہ 55 ہزار 243 سے زائد افراد زخمی ہو چکے ہیں، زخمیوں اور شہدا میں نصف سے زائد تعداد صرف بچوں اور خواتین پر مشتمل ہے۔
