بلوچستان کے علاقے قلات میں سیکیورٹی فورسز نے دہشت گردوں کے خلاف کامیاب آپریشن کیا ہے، آئی ایس پی آر کے مطابق کارروائی میں 5 دہشت گرد مارے گئے ہیں، ہلاک دہشت گردوں کے ٹھکانے سے اغوا کیے گئے 23 افراد کو بھی بحفاظت بازیاب کرا لیا گیا ہے، اس دوران دہشت گردوں کے زیرِ استعمال گاڑیاں بھی برآمد ہوئی ہیں ۔
پاک فوج کے شعبۂ تعلقاتِ عامہ کی جانب سے جاری کردہ بیان میں کہا گیا ہے کہ سیکیورٹی فورسز نے ضلع قلات میں ایم 25 پر کامیاب کارروائی کی، اس دوران دہشتگردوں کیساتھ فائرنگ کا تبادلہ بھی ہوا ۔
آئی ایس پی آر کے بیان کے مطابق اس دوران پانچ دہشت گرد انجام تک پہنچائے گئے، 23 مغوی افراد کو بھی دہشت گردوں کے ٹھکانے سے بحفاظت بازیاب کرا لیا گیا ہے ۔
آئی ایس پی آر کے مطابق دہشت گردوں کے قبضے سے 6 ٹرک، 3 بسیں اور 2 کاریں برآمد ہوئی ہیں، اس دوران سیکیورٹی فورسز کو دہشت گردوں کے قبضے سے بڑی مقدار میں اسلحہ اور بارود بھی ہاتھ لگا ہ ۔
دہشت گردوں نے اغوا، بھتہ خوری اور گاڑی چھیننے کے لیے چیک پوسٹ قائم کی ہوئی تھی، اور دہشت گرد عام عوام کی آمدو رفت میں رکاوٹ ڈالنے کی کوشش کر رہے تھے ۔
دوسری جانب صدر آصف علی زرداری اور وزیراعظم شہباز شریف نے قلات شہر میں دہشت گردوں کے خلاف سیکیورٹی فورسز کے کامیاب آپریشن کی تحسین کی ہے ۔
دونوں رہنماؤں نے دہشت گردوں کے قبضے سے 23 افراد کو بازیاب کرانے پر سیکیورٹی اہلکاروں کو خراجِ تحسین پیش کیا ہے اور کہا ہے کہ دہشت گردی کے مکمل خاتمے تک سیکیورٹی فورسز کی کارروائیاں جاری رہیں گی ۔
