اسلام آباد: وفاقی حکومت نے نگران دور حکومت میں پیدا کیے گئے گندم سکینڈل کے ذمہ دار افسران کے خلاف کارروائی کا فیصلہ کر لیا۔
ذرائع کے مطابق وزیراعظم شہباز شریف نے گندم سکینڈل کی تحقیق کے لیے بنائی گئی انکوائری کمیٹی کی سفارشات کی منظوری دے دی ہے۔ انکوائری کمیٹی کی فائنڈنگز نے وزارت نیشنل فوڈ سکیورٹی کے 4 افسروں کو معطل کرنے کا کہا ہے جس کی منظوری دے دی گئی ہے۔
ذرائع کے مطابق سابق وفاقی سیکرٹری نیشنل فوڈ سکیورٹی محمد آصف کے خلاف باضابطہ کارروائی کی جائے گی جبکہ سابق ڈی جی پلانٹ پروٹیکشن اے ڈی عابد، فوڈ سکیورٹی کمشنر ون ڈاکٹر وسیم اور ڈائریکٹر سہیل کو معطل کرنے کا فیصلہ کیا گیا ہے۔ ذرائع کا کہنا ہے کہ ذمہ دار افسروں پر ناقص منصوبہ بندی اور غفلت برتنے کا الزام لگایا گیا ہے۔
واضح رہے کہ ضرورت سے زائد گندم درآمد کرنے سے ملک میں گندم کی مارکیٹ تباہ ہو گئی تھی نتیجتاً کسانوں کو گندم سستے داموں فروخت کرنا پڑی۔
