سنکیانگ: وزیراعلیٰ پنجاب مریم نواز شریف وفد سمیت چین کی معروف ٹائرن وزڈم ڈیری کمپنی کے ہیڈکوارٹر پہنچیں، جہاں ان کا پرتپاک خیرمقدم کیا گیا۔
وزیراعلیٰ مریم نواز شریف نے ٹائرن وزڈم ڈیری ورکس کے مختلف شعبوں کا دورہ کیا۔
کمپنی حکام نے وزیراعلیٰ پنجاب مریم نواز شریف کو تفصیلی بریفنگ دی۔
مریم نواز شریف نے ملک پروسیسنگ کا ڈیجیٹل معائنہ کیا اور انہیں ملک پروسیسنگ کے مختلف مراحل سے آگاہ کیا گیا۔
ماہرین نے ملک پروڈکٹس کی تیاری کے مراحل کی تفصیلات بیان کیں۔
بریفنگ میں بتایا گیا کہ ٹائرن وزڈم ڈیری ورکس چین کے مختلف علاقوں میں جدید ترین ڈیری فارمنگ کے لیے معروف ہے، جہاں فارمز پر مویشیوں کی حفظان صحت کے اصولوں کے مطابق پرورش کی جاتی ہے۔
کمپنی میں دودھ، دہی اور دیگر ملک پروڈکٹس کی جدید طریقے سے پروسیسنگ کی جاتی ہے۔
مریم نواز شریف نے کہا کہ پنجاب میں لائیو سٹاک میں بہتری اور فروغ کے پراجیکٹس نتیجہ خیز ثابت ہو رہے ہیں۔
دیہی خواتین کی مالی خودمختاری اور مویشیوں کی افزائش نسل کے سپیشل پراجیکٹ کامیابی سے جاری ہیں۔
وزیراعلیٰ پنجاب نے کہا کہ مویشیوں کو فربہ کرکے میٹ پروڈکشن کے لیے تیار کیا جا رہا ہے۔
انہوں نے کہا کہ چین کے اشتراک سے پنجاب میں ملک اور ڈیری پراسیسنگ پراجیکٹ قائم کرنا چاہتے ہیں۔
