چین نے امریکہ کی جانب سے آبنائے ہرمز کی مبینہ ناکہ بندی کو غیر ذمہ دارانہ اور خطرناک اقدام قرار دیتے ہوئے کہا ہے کہ اس سے خطے میں کشیدگی مزید بڑھ سکتی ہے۔
چینی وزارت خارجہ کے ترجمان کے جاری کردہ بیان میں کہا گیا ہے کہ آبنائے ہرمز کی بندش سمندری آمدورفت کے لیے سنگین خطرات پیدا کرے گی اور عالمی تجارت بھی متاثر ہو سکتی ہے۔
ترجمان نے زور دیا کہ موجودہ صورتحال نہایت نازک ہے اور حالات کی بہتری کے لیے مکمل جنگ بندی ضروری ہے۔ ان کا کہنا تھا کہ چین مشرق وسطیٰ میں امن اور استحکام کے لیے اپنی کوششیں جاری رکھے گا۔
چینی ترجمان نے ایران کو اسلحہ فراہم کرنے سے متعلق خبروں کو مسترد کرتے ہوئے انہیں بے بنیاد قرار دیا اور کہا کہ اس حوالے سے گردش کرنے والی اطلاعات درست نہیں ہیں۔
