پاکستانی شوبز انڈسٹری کی سینیئر اداکارہ بشریٰ انصاری نے سوشل میڈیا پر ایک تصویر جاری کی جس میں انہوں نے طنزیہ کیپشن تحریر کیا ہے۔
بشریٰ انصاری حال ہی میںرمضان ٹرانسمیشن میں شریک ہوئیں جس میں انہوں نے سفید لباس پر بڑی سی چادر اوڑھ رکھی تھی جس پر شاعرِ مشرق علامہ اقبال کے شعر لکھے تھے۔بشریٰ انصاری نے تصویر شیئر کرتے ہوئے کیپشن میں لکھا کہ ‘یہ رمضان ٹرانسمیشن کی تصویر ہے اور علامہ اقبال کی شاعری میری شال پر لکھی ہے’۔انہوں نے طنز کرتے ہوئے کہا ‘اب اردو پڑھنی آتی ہوگی تو سمجھ آجائے گا’۔
واضح رہے کہ بظاہر بشریٰ انصاری نے یہ طنز گزشتہ ماہ لاہور کے اچھرہ بازار میں پیش آنے والے افسوسناک واقعہ پر کیا جہاں شاپنگ کے لیے آئی ایک خاتون نے عربی حروف تہجی والا لباس پہنا ہوا تھا جسے دیکھ کر مشتعل ہجوم نے خاتون پر توہین مذہب کا الزام عائد کردیا تھا۔
