بنگلہ دیش پریمیئر لیگ ہفتے کے روز ایک دل دہلا دینے والے واقعے کی وجہ سے سوگ میں ڈوب گئی، جب ڈھاکہ کیپیٹلز کے اسسٹنٹ کوچ محبوب علی زکی میچ سے کچھ ہی دیر پہلے دل کا دورہ پڑنے کے باعث اچانک گر پڑے اور جانبر نہ ہو سکے۔
یہ افسوسناک واقعہ سلہٹ میں اس وقت پیش آیا جب ڈھاکہ کیپیٹلز اور راجشاہی واریئرز کے درمیان میچ شروع ہونے میں صرف 20 منٹ باقی تھے.
دونوں ٹیموں کے کھلاڑی ڈریسنگ روم کے قریب وارم اپ میں مصروف تھے کہ اچانک محبوب علی زکی کی طبیعت بگڑ گئی اور وہ زمین پر گر پڑے.
موقع پر موجود میڈیکل اسٹاف نے فوراً سی پی آر سمیت ہنگامی طبی امداد دی اور انہیں فوری طور پر اسپتال منتقل کیا گیا، تاہم ڈاکٹروں کی بھرپور کوششوں کے باوجود وہ دل کا دورہ پڑنے کے باعث انتقال کر گئے۔ ان کے اچانک انتقال کی خبر سے کھلاڑی، آفیشلز اور اسپورٹس اسٹاف شدید صدمے میں مبتلا ہو گئے۔
