آزاد جموں کشمیر میں کالعدم عوامی ایکشن کمیٹی کے 72 افراد کو گرفتار کرلیا گیا، اپولیس ترجمان کے مطابق قانون ہاتھ میں لینے والوں کے خلاف سخت کارروائی کی جائے گی ۔
مظفرآباد: ترجمان انسپکٹر جنرل پولیس کے مطابق گرفتار افراد کے قبضے سے اسلحہ، مواصلاتی آلات اور مشتبہ دستاویزات برآمد ہوئی ہیں ۔
ترجمان نے بتایاکہ کالعدم تنظیم کے بعض عناصر عوامی مسائل کے نام پر امن و امان خراب کر رہے ہیں، امن خراب کرنے کی کسی کوشش کی اجازت نہیں دی جائے گی ۔
ان کا کہنا تھا قانون ہاتھ میں لینے والوں کے خلاف سخت کارروائی کی جائے گی، گرفتار ملزمان کے خلاف قانونی کارروائی شروع کر دی گئی ہے، عوام کی جان و مال کے تحفظ کیلئے ضروری قانونی اقدامات کیے جا رہے ہیں ۔
دوسری جانب آزاد کشمیرمیں کالعدم تنظیم کی 9 جون کو ہڑتال کی کال پر معمولات زندگی متاثر ہیں، انٹرنیٹ سروس بھی معطل ہے۔ مظفر آباد، باغ اور میرپور میں امن امان کے پیش نظر فلیگ مارچ کیا گیا ۔
ہڑتال کے باعث بازار بند ہونے کے خدشے کے پیش نظر بازاروں میں لوگوں کا رش ہے اور کئی علاقوں میں پیٹرول کی قلت پیدا ہو گئی ہے جہاں پیٹرول دستیاب ہے وہاں گاڑیوں کی قطاریں لگی ہوئی ہیں ۔
اُدھر 9 جون کو آزاد کشمیر میں کالعدم تنظیم کے احتجاج کی کال کے باعث اسلام آباد سے آزادکشمیر پہنچنے والی سکیورٹی نفری جگہ جگہ تعینات کردی گئی ہے اور تمام حساس علاقوں کی سکیورٹی ہائی الرٹ ہے ۔
