اسلام آباد: وفاقی وزیر اطلاعات و نشریات عطاء اللہ تارڑ نے کہا ہے کہ بھارت نے پاکستان پر جارحیت مسلط کی جبکہ پاکستان ایک ذمہ دار اور امن پسند ملک کے طور پر ہمیشہ خطے میں استحکام کا خواہاں رہا ہے۔
انہوں نے کہا کہ دہشت گردی کے خلاف جنگ میں پاکستان فرنٹ لائن اسٹیٹ کا کردار ادا کر رہا ہے جب کہ دہشت گردی بھارت کا اندرونی مسئلہ ہے، بیرونی نہیں۔
انسٹیٹیوٹ آف اسٹریٹجک اسٹڈیز میں "معرکۂ حق” کی مناسبت سے منعقدہ سیمینار سے خطاب کرتے ہوئے وفاقی وزیر اطلاعات نے کہا کہ جموں و کشمیر ایک عالمی مسئلہ ہے اور اس حوالے سے اقوام متحدہ کی قراردادیں موجود ہیں۔
انہوں نے کہا کہ داخلی مسائل کو خارجی اور خارجی مسائل کو داخلی رنگ دینا بھارت کا پرانا وطیرہ ہے۔
وفاقی وزیر اطلاعات نے کہا کہ بھارت نے پاکستان میں سویلین آبادی کو نشانہ بنایا جب کہ پاکستان نے صرف عسکری اہداف کو ٹارگٹ کیا۔
انہوں نے کہا کہ پہلگام واقعے کے حوالے سے مقامی افراد اور صحافیوں کو بیلا نور شاہ کے علاقے کا دورہ بھی کروایا گیا تاکہ حقائق دنیا کے سامنے لائے جا سکیں۔
عطاء اللہ تارڑ نے کہا کہ ایک ایسا ملک پاکستان پر دہشت گردی کے الزامات لگا رہا ہے جو خود کینیڈا اور دیگر ممالک میں سکھ رہنماؤں کے قتل میں ملوث پایا گیا۔
انہوں نے کہا کہ پاکستان دہشت گردی کے خلاف جنگ لڑ رہا ہے جبکہ بھارت دہشت گردی کو فروغ دے رہا ہے۔
وفاقی وزیر اطلاعات نے کہا کہ معرکۂ حق کے دوران پاکستانی میڈیا نے ذمہ دارانہ کردار ادا کیا۔
بھارتی میڈیا اور حکومت نے ہمیشہ کی طرح جھوٹ اور غلط بیانی کا مظاہرہ کیا۔
انہوں نے کہا کہ پاکستان نے بیانیہ، عسکری اور سفارتی محاذوں پر کامیابی حاصل کی جب کہ پاکستان کی سول و عسکری قیادت ایک پیج پر تھی اور ہر سطح پر مکمل تعاون اور ہم آہنگی موجود تھی۔
