اسلام آباد میں حالیہ بینک ڈکیتیوں میں ملوث ڈکیت ملزم سلیمان ہلاک ہو گیا۔ ترجمان اسلام آباد پولیس کے مطابق تھانہ سمبل کے علاقہ میں پولیس ٹیم ملزم کو برآمدگی کے لئے لے کرجارہی تھی کہ گولڑا موڑ کے قریب موٹرسائیکل پر سوار تین ملزمان نے اچانک پولیس ٹیم پر فائرنگ کر دی۔ بلٹ پروف جیکٹس پہننے کی وجہ سے پولیس جوان ملزمان کی فائرنگ سے محفوظ رہے تاہم ملزمان کی فائرنگ سے پولیس حراست میں موجود ملزم سلیمان شدید زخمی ہوگیا۔ ملزم کو فوری طبی امداد کے لئے ہسپتال منتقل کیا گیا جہاں وہ زخموں کی تاب نہ لاتے ہوئے دم توڑ گیا۔ پولیس ٹیمیں فائرنگ کرنے والے ملزمان کی گرفتاری کے لئے چھاپے ماررہی ہے۔
