دینہ: دینہ کے نواحی علاقے ٹھیکریاں میں نوجوان گہرے کنویں میں گر کر جاں بحق ہو گیا۔ کنویں میں گرنے والے نوجوان کو ریسکیو 1122کے عملے نے مسلسل جدوجہد کے بعد نکال لیا۔ ریسکیو کنٹرول روم میں ایک مدرسے سے کال موصول ہوئی کہ ایک ساتھی طالبعلم مدرسے کے کنویں میں گر گیا ہے۔ اطلاع موصول ہوتے ہی ریسکیو1122دینہ کی امدادی ٹیمیں موقع پر روانہ ہو گئیں، رات کی تاریکی میں تقریباً 100 فٹ گہرے کنویں میں گرنے والے شخص کی تلاش شروع کر دی۔ جاں بحق نوجوان کی شناخت سعوڈی گجر تحصیل پنڈدادنخان کے رہائشی 18سالہ عادل ارشد کے نام سے ہوئی ہے۔
ذرائع کے مطابق 18سالہ طالب علم چکر آنے کے باعث کنویں میں گرا۔ سوالیہ نشان یہ ہے کہ مدرسے میں واقع کنویں پر کوئی حفاظتی جنگلا کیوں نہیں تھا۔
