مانسہرہ پوليس کی اہم کارروائی، تھانہ ناران کی حدود میں سرکاری سکول کی عمارت سے شراب کی بڑی کھیپ برآم، ذرائع کا کہنا ہے کہ شراب ناران اور شوگران کے کئی بڑے ہوٹلز کو سپلائی کی جاتی تھی،محکمہ تعلیم کے کئی اہلکار بھی ملوث ہیں۔
تفصیلات کے مطابق پولیس کے مطابق تھانہ ناران کی حدود درسیری میں سرکاری سکول کی عمارت میں شراب کی بڑی مقدار چھپائی گئی تھی جس پر کارروائی کرتے ہوئے 70 بوتل شراب، دو عدد 12 لیٹر کے گیلن اور شراب کشی میں استعمال ہونے والا کیمیکل و دیگر مواد برآمد کرلیا ۔
پولیس نے مقدمہ درج کر کے اس غیر قانونی کاروبار میں ملوث افراد، سہولت کاروں اور دیگر مشتبہ عناصر کی تلاش اور مزید تفتیش کا سلسلہ جاری ہے ۔
ڈی پی او مانسہرہ شفیع اللہ گنڈاپور نے تھانہ ناران پولیس کی اس کامیاب کارروائی پر شاباش دیتے ہوئے کہاکہ ناران ضلع مانسہرہ کا ایک خوبصورت، پرامن اور بین الاقوامی شہرت یافتہ سیاحتی مقام ہے، جہاں ملک بھر سے سیاح اپنی فیملیز کے ہمراہ آتے ہیں اور قدرتی حسن سے لطف اندوز ہوتے ہیں۔مانسہرہ پولیس ناران کو ایک محفوظ، خوشگوار اور فیملی فرینڈلی ٹورازم زون بنانے کے لیے پرعزم ہے ۔
