سرویکئی: ایف سی کے زیرِ انتظام جنوبی وزیرستان میں عوامی مسائل کے حل اور امن و استحکام کے فروغ کے لیے کھلی کچہری اور گرینڈ جرگہ کا انعقاد کیا گیا۔
سرویکئی میں ایف سی کے بریگیڈ کمانڈر اور اسسٹنٹ کمشنر کی زیرِ نگرانی کھلی کچہری منعقد ہوئی.
کچہری میں علاقے کے عمائدین، مقامی افراد اور مختلف مکاتبِ فکر سے تعلق رکھنے والے شہریوں نے شرکت کی۔
کھلی کچہری کے دوران شہریوں نے اپنے مسائل، شکایات اور تجاویز حکام کے سامنے پیش کیں، جن کے فوری حل کی یقین دہانی کرائی گئی۔
دوسری جانب جنڈولہ میں ایف سی کے مقامی ونگ کمانڈر نے اے آر ڈی سی ممبر اور قبائلی عمائدین کے ساتھ گرینڈ جرگہ منعقد کیا۔
جرگہ میں علاقے کی مجموعی صورتحال، جاری سکیورٹی آپریشنز، امن و استحکام اور باہمی تعاون کے فروغ پر تفصیلی گفتگو کی گئی۔
جرگہ کے شرکاء نے علاقے میں پائیدار امن، دہشت گردی کے خاتمے اور معمولاتِ زندگی کی بہتری کے لیے مشترکہ کوششوں پر زور دیا۔
شرکاء نے کہا کہ امن کے قیام کے لیے قبائلی عوام اور سکیورٹی فورسز کا باہمی اعتماد اور تعاون ناگزیر ہے۔
شرکاء نے دہشت گردی کے خاتمے کے لیے ایف سی کے جاری اقدامات میں اپنے مکمل تعاون اور حمایت کی یقین دہانی بھی کرائی۔
انہوں نے امید ظاہر کی کہ اس طرح کی کھلی کچہریوں اور جرگوں سے عوام اور انتظامیہ کے درمیان رابطہ مزید مضبوط ہوگا اور علاقے میں ترقی و خوشحالی کی راہ ہموار ہوگی۔


