اسلام آباد: وفاقی حکومت اور خیبرپختونخوا کے نامزد سیاسی و انتظامی سیٹ اپ کے درمیان عبوری مالیاتی معاہدہ طے پا گیا ہے.
معاہدے کے تحت صوبہ قومی اقتصادی منصوبوں اور سکیورٹی اخراجات کے لیے سالانہ 157 ارب روپے نقد گرانٹ فراہم کرے گا۔
معاہدے کے مطابق قومی اقتصادی اقدامات کے لیے چاروں صوبے مجموعی طور پر 1035 ارب روپے فراہم کریں گے۔
اس رقم میں پنجاب کا حصہ 556 ارب روپے، سندھ کا 264 ارب روپے، خیبرپختونخوا کا 157 ارب روپے اور بلوچستان کا 58 ارب روپے مقرر کیا گیا ہے۔
عبوری معاہدے کے تحت وفاقی حکومت کی جانب سے خیبرپختونخوا کے قومی مالیاتی کمیشن (این ایف سی) کے حصے سے جولائی تا اکتوبر پہلے ہی منہا کیے گئے 17.8 ارب روپے کو بھی قانونی تحفظ دے دیا گیا ہے۔
وزارت خزانہ کے ایک سینئر افسر کے مطابق معاہدے پر رواں ماہ کے آغاز میں دستخط کیے گئے۔
خیبرپختونخوا کی ایڈوائزری کونسل کے مشیر برائے خزانہ و محصولات طارق پاشا نے بھی معاہدے کی تصدیق کی ہے۔
ان کے مطابق آئین کے آرٹیکل 164 کے تحت وفاقی اور صوبائی حکومت کے درمیان مرکز کو نقد گرانٹ فراہم کرنے کا معاہدہ کیا گیا ہے۔
وزارت خزانہ کے اعدادوشمار کے مطابق رواں مالی سال کے پہلے چار ماہ، یعنی جولائی سے اکتوبر کے دوران چاروں صوبوں نے مجموعی طور پر 107.3 ارب روپے فراہم کیے۔
اس رقم میں پنجاب کے 55.7 ارب روپے، سندھ کے 27.3 ارب روپے، خیبرپختونخوا کے 17.8 ارب روپے اور بلوچستان کے 6.5 ارب روپے شامل ہیں۔
اعدادوشمار کے مطابق پہلے تین ماہ کے دوران صوبوں کی جانب سے 57.5 ارب روپے نقد گرانٹ فراہم کی گئی تھی، جس میں خیبرپختونخوا کے حصے سے منہا کیے گئے 12.7 ارب روپے بھی شامل تھے۔
دوسری جانب وفاقی حکومت رواں ماہ آبی شعبے کے چھ ترجیحی منصوبوں کے لیے 275 ارب روپے کی منظوری بھی دے چکی ہے۔
وزارت خزانہ کے مطابق عبوری معاہدے میں وفاقی حکومت کی مالی ذمہ داریوں اور ملک بھر کو متاثر کرنے والے مالی معاملات کے انتظام کو بھی واضح کیا گیا ہے۔


