اسلام آباد: پاکستان اور جاپان کے درمیان 350 ملین جاپانی ین (2.2 ملین امریکی ڈالر) کی گرانٹ کے معاہدے پر دستخط ہو گئے۔
وزارت اقتصادی امور کے مطابق گرانٹ کی رقم سے انسانی وسائل کی ترقی کے لیے سکالرشپ پروگرام (جے ڈی ایس) 2026 کو مزید مستحکم بنایا جائے گا۔
سیکریٹری اقتصادی امور محمد حمیر کریم اور جاپانی سفیر اکاماتسو شوئیچی نے ریکارڈ آف ڈسکشنز پر دستخط کیے۔
سینئر جوائنٹ سیکریٹری میران محی الدین سومرو اور جائیکا کے چیف نمائندے یوسوکے شینوزاکی نے گرانٹ معاہدے پر دستخط کیے۔
وزارت اقتصادی امور میں منعقدہ تقریب میں جاپانی سفارتخانے، جائیکا اور وزارت کے اعلیٰ حکام نے شرکت کی۔
جے ڈی ایس گرانٹ کے تحت وفاقی سول سروس افسران کو جاپان میں ماسٹرز کے لیے 16 اور پی ایچ ڈی کے لیے 1 سکالرشپ دی جائے گی۔
2018 سے اب تک جے ڈی ایس سکالرشپ کے تحت 8 بیچز مستفید ہو چکے ہیں جس سے افسران کی استعداد کار میں اضافہ ہوا ہے۔
جاپان پاکستانی حکومتی افسران کو مختلف قلیل مدتی تربیتی کورسز کے لیے بھی باقاعدگی سے مدعو کرتا ہے۔
سیکریٹری اقتصادی امور محمد حمیر کریم نے بامعنی تعاون کے فروغ پر جاپانی حکومت اور عوام کا شکریہ ادا کیا۔
جاپانی سفیر اور جائیکا کے چیف نمائندے نے دوستانہ تعلقات اور دوطرفہ تعاون کو مزید مستحکم کرنے کے عزم کا اعادہ کیا۔
