ضلع بنوں کی تحصیل بکاخیل میں دہشت گردوں کے خلاف سیکیورٹی فورسز کا آپریشن دوسرے روز بھی جاری ہے، جبکہ علاقے میں کرفیو نافذ ہونے کے باعث آمدورفت کے تمام راستے بند ہیں۔
سیکیورٹی ذرائع کے مطابق فورسز نے دہشت گردوں کے خلاف سرچ آپریشن مزید تیز کر دیا ہے۔ ذرائع کا کہنا ہے کہ جاری کارروائی کے دوران اب تک 24 سے زائد دہشت گرد ہلاک کیے جا چکے ہیں۔
دوسری جانب ضلعی انتظامیہ اور مقامی عمائدین کے درمیان ایک جرگہ بھی منعقد ہوا، جس میں علاقے سے دہشت گردی کے مکمل خاتمے کے لیے باہمی تعاون اور مشترکہ حکمت عملی اپنانے پر اتفاق کیا گیا۔ سیکیورٹی فورسز کی کارروائی آخری اطلاعات تک جاری تھی۔
