پی ڈی ایم اے پنجاب نے صوبے بھر میں آندھی، بارشوں اور ژالہ باری کا الرٹ جاری کر دیا ہے۔ ترجمان کے مطابق 11 سے 13 جون تک پنجاب کے بیشتر اضلاع میں بارش کا امکان ہے۔
پی ڈی ایم اے پنجاب بارش الرٹ کے مطابق مختلف علاقوں میں تیز ہوائیں چل سکتی ہیں، جبکہ بعض مقامات پر ژالہ باری بھی متوقع ہے۔
پنجاب کے مختلف اضلاع میں بارش کا امکان
پی ڈی ایم اے کے مطابق راولپنڈی، مری، اٹک، جہلم، چکوال، بھکر، لیہ اور فیصل آباد میں بارش کا امکان ظاہر کیا گیا ہے۔
لاہور، سیالکوٹ، نارووال، جھنگ اور گردونواح میں بھی بارش ہو سکتی ہے۔ اس کے علاوہ اوکاڑہ، گوجرانوالہ، حافظ آباد اور وزیرآباد میں بھی بارش متوقع ہے۔
جنوبی پنجاب میں بھی بارشوں کی پیشگوئی
پی ڈی ایم اے کے مطابق سرگودھا، میانوالی، شیخوپورہ، خوشاب، ڈیرہ غازی خان، بہاولپور اور بہاولنگر میں بھی بارشوں کا امکان ہے۔
ملتان، خانیوال، لودھراں، مظفرگڑھ، راجن پور، رحیم یار خان، کوٹ ادو اور منڈی بہاؤالدین میں بھی بارشیں متوقع ہیں۔
انتظامیہ کو پیشگی اقدامات کی ہدایت
پی ڈی ایم اے پنجاب نے تمام کمشنرز اور ڈپٹی کمشنرز کو الرٹ جاری کر دیا ہے۔ متعلقہ اداروں کو ہدایت کی گئی ہے کہ بارشوں، تیز ہواؤں اور ژالہ باری کے پیش نظر پیشگی انتظامات مکمل رکھے جائیں۔
ترجمان کے مطابق شہری غیر ضروری سفر سے گریز کریں اور خراب موسم کے دوران احتیاطی تدابیر اختیار کریں۔
شہریوں کو محتاط رہنے کی اپیل
پی ڈی ایم اے نے عوام سے اپیل کی ہے کہ آندھی اور بارش کے دوران کمزور چھتوں، بجلی کے کھمبوں، درختوں اور سائن بورڈز سے دور رہیں۔
حکام کا کہنا ہے کہ کسی بھی ہنگامی صورتحال سے نمٹنے کے لیے متعلقہ ادارے الرٹ رہیں گے۔
