تھانہ صدر واہ کے علاقے میں رات گئے کار سوار پانچ ملزمان اور پولیس پارٹی کے درمیان فائرنگ کا تبادلہ ہوا، جس کے نتیجے میں دو کار لفٹر زخمی حالت میں گرفتار کر لیے گئے جبکہ گزشتہ ماہ چوری کی گئی گاڑی اور اسلحہ بھی برآمد کر لیا گیا۔
پولیس کے مطابق مشکوک کار سواروں کو رکنے کا اشارہ کیا گیا تو ملزمان نے پولیس پارٹی پر اندھا دھند فائرنگ شروع کر دی۔ جوابی کارروائی میں دو ملزمان زخمی حالت میں گرفتار ہوئے جبکہ ان کے دیگر ساتھی موقع سے فرار ہونے میں کامیاب ہو گئے۔
فائرنگ کے دوران دو گولیاں ہیڈ کانسٹیبل محمد اعجاز کو بھی لگیں، تاہم بلٹ پروف جیکٹ پہننے کی وجہ سے وہ محفوظ رہے۔ اطلاع ملنے پر سینئر پولیس افسران موقع پر پہنچ گئے اور علاقے کو گھیرے میں لے کر سرچ آپریشن شروع کر دیا گیا۔
پولیس نے زخمی ملزمان کو فوری طور پر اسپتال منتقل کر دیا جبکہ جائے وقوعہ سے شواہد بھی اکٹھے کر لیے گئے۔
پولیس حکام کے مطابق گرفتار ملزمان اسلام آباد اور خیبرپختونخوا میں گاڑی چوری، اقدامِ قتل، دھوکہ دہی اور ناجائز اسلحہ جیسے سنگین مقدمات میں ریکارڈ یافتہ ہیں۔
سی پی او سید خالد محمود ہمدانی نے پولیس ٹیم کی بہادری کو سراہتے ہوئے ایس پی پوٹھوہار، ایس ڈی پی او ٹیکسلا اور صدر واہ پولیس کو شاباش دی اور کہا کہ شہریوں اور پولیس پر حملہ کرنے والے قانون کی گرفت سے نہیں بچ سکتے۔
