اسلام آباد: وزیراعظم شہباز شریف نے وزیراعظم اپنا گھر اسکیم کا باقاعدہ افتتاح کر دیا، جس کے تحت شہریوں کو گھر خریدنے کے لیے ایک کروڑ روپے تک قرض فراہم کیا جائے گا۔
تقریب سے خطاب کرتے ہوئے وزیراعظم نے کہا کہ وزیراعظم اپنا گھر اسکیم کے تحت قرض 20 سال کی مدت کے لیے دیا جائے گا اور درخواست گزاروں کو آن لائن اپلائی کرنا ہوگا۔ درخواست کی منظوری ایک ماہ کے اندر دی جائے گی۔
انہوں نے بتایا کہ اس اسکیم کے تحت 10 مرلہ پلاٹ یا 10 مرلے کا تیار گھر خریدا جا سکے گا۔ فنانسنگ کا 90 فیصد حصہ حکومت فراہم کرے گی جبکہ 10 فیصد رقم درخواست گزار کو خود ادا کرنا ہوگی۔
وزیراعظم نے واضح کیا کہ وزیراعظم اپنا گھر اسکیم کے تحت قرض حاصل کرنے کے لیے کسی قسم کی فیس یا پیشگی ادائیگی ضروری نہیں ہوگی۔ قرض اسلامی، کمرشل بینکوں، مائیکروفنانس اداروں اور ہاؤس بلڈنگ فنانس کمپنیوں کے ذریعے فراہم کیا جائے گا۔
اس اسکیم کے تحت شہری 25 لاکھ، 50 لاکھ، 75 لاکھ یا ایک کروڑ روپے تک قرض حاصل کر سکیں گے۔ پہلے 10 سال کے لیے 5 فیصد فکسڈ مارک اپ ہوگا جبکہ اگلے 10 سال کے لیے نارمل مارک اپ لاگو ہوگا۔
قسطوں کی تفصیل کے مطابق:
- 25 لاکھ قرض پر ماہانہ قسط: 16,499 روپے
- 50 لاکھ قرض پر ماہانہ قسط: 32,997 روپے
- 75 لاکھ قرض پر ماہانہ قسط: 49,497 روپے
- ایک کروڑ قرض پر ماہانہ قسط: 65,996 روپے
وزیراعظم نے کہا کہ قرض حاصل کرنے کے لیے شناختی کارڈ ہولڈر کا پہلے سے کسی قرض کا نادہندہ نہ ہونا ضروری ہوگا۔ اسٹیٹ بینک آف پاکستان اور پاکستان ہاؤسنگ اتھارٹی فاؤنڈیشن اس منصوبے کی نگرانی کریں گے۔
وزیراعظم شہباز شریف نے کہا کہ عوام کو چھت فراہم کرنا ایک مقدس فریضہ ہے اور ملک کی بڑی آبادی اب بھی اپنے گھر سے محروم ہے۔ انہوں نے کہا کہ وزیراعظم اپنا گھر اسکیم پورے ملک کے لیے ہے، کسی ایک علاقے تک محدود نہیں۔
انہوں نے مزید بتایا کہ اگلے چار سال میں 5 لاکھ گھروں کی تعمیر کا ہدف مقرر کیا گیا ہے، جس سے نہ صرف عوام کو رہائش ملے گی بلکہ تعمیراتی شعبے میں بھی تیزی آئے گی اور معیشت کو فروغ ملے گا۔
وزیراعظم کا کہنا تھا کہ وزیراعظم اپنا گھر اسکیم میں نمایاں کردار ادا کرنے والے بینکوں کو خصوصی ایوارڈز بھی دیے جائیں گے۔ تقریب کے دوران کامیاب درخواست گزاروں میں چیکس بھی تقسیم کیے گئے۔
