وفاقی وزیر خزانہ محمد اورنگزیب نے کہا ہے کہ پاکستان اور آئی ایم ایف کے درمیان اسٹاف لیول مذاکرات کامیابی سے مکمل ہو چکے ہیں اور جلد ہی عالمی مالیاتی فنڈ کا ایگزیکٹو بورڈ اس کی منظوری دے گا، جس کے بعد پاکستان کے لیے نئی قسط جاری ہونے کی راہ ہموار ہو جائے گی۔
انہوں نے یہ بات واشنگٹن میں ایس اینڈ پی گلوبل ریٹنگ کے نمائندوں سے ملاقات کے دوران کہی، جہاں پاکستان کی معاشی صورتحال، بہتری اور عالمی مارکیٹوں میں واپسی کے امکانات پر تفصیلی تبادلہ خیال کیا گیا۔
وزیر خزانہ کے مطابق پاکستان نے کامیابی کے ساتھ ایک اعشاریہ چار ارب ڈالر مالیت کے یورو بانڈز واپس کر دیے ہیں، جو ملک کی مالی ساکھ میں بہتری کا واضح ثبوت ہے۔ انہوں نے مزید کہا کہ سعودی عرب کی جانب سے اضافی مالی معاونت اور ڈپازٹس میں توسیع سے پاکستان کی مالی پوزیشن مزید مستحکم ہوگی۔
محمد اورنگزیب نے اس اعتماد کا اظہار کیا کہ آئی ایم ایف پروگرام کی پیش رفت سے نہ صرف معیشت کو سہارا ملے گا بلکہ عالمی سرمایہ کاروں کا اعتماد بھی بحال ہوگا، جس سے ملک کی اقتصادی صورتحال مزید بہتر ہونے کی توقع ہے۔
