اسلام آباد: گولڑہ شریف کی معروف روحانی و مذہبی شخصیت اور سجادہ نشین درگاہ غوثیہ گولڑہ شریف پیر سید معین الحق گیلانی کے بڑے صاحبزادے، پیر سید مہر فرید الحق گیلانی انتقال کر گئے۔
ان کے انتقال کی خبر پھیلتے ہی عقیدت مندوں میں گہرے دکھ اور افسوس کی لہر دوڑ گئی، جبکہ ہر آنکھ اشکبار دکھائی دی۔
ترجمان کے مطابق، مرحوم کی نماز جنازہ آج بعد نماز عصر گولڑہ شریف میں ادا کی جائے گی، جس میں ملک بھر سے عقیدت مندوں کی بڑی تعداد کی شرکت متوقع ہے۔
پیر سید مہر فرید الحق گیلانی اپنی صوفیانہ تعلیمات، روحانی خدمات اور انسانیت سے محبت کے جذبے کے باعث ایک نمایاں مقام رکھتے تھے۔ انہوں نے نہ صرف درگاہ کے انتظامی امور بخوبی سنبھالے بلکہ عوام کی روحانی رہنمائی میں بھی اہم کردار ادا کیا۔ ان کی شخصیت سادگی، محبت اور رواداری کی روشن مثال سمجھی جاتی تھی۔
چیئرمین پاکستان پیپلز پارٹی بلاول بھٹو زرداری نے اپنے تعزیتی پیغام میں کہا کہ پیر سید مہر فرید الحق گیلانی کی خدمات ہمیشہ یاد رکھی جائیں گی اور ان کی صوفیانہ تعلیمات رہتی دنیا تک انسانیت کی رہنمائی کرتی رہیں گی۔
