پاکستان پوری دنیا کی توجہ کا مرکز بن گیا، ایران اور امریکہ کے درمیان جنگ بندی کے بعد مذاکرات آج اسلام آباد میں ہورہے ہیں ،ذرائع نے بتایا کہ یہ مذاکرات کل ہفتے کو بھی جاری رہ سکتے ہیں ۔
اسلام آباد: معتبر ذرائع کے مطابق وفود کی سطح پر مذاکرات آج اور اہم مرکزی مرحلہ ہفتے کو وفاقی دارالحکومت اسلام آباد میں ہوگا ۔
مذاکرات میں امریکی مذاکراتی وفد میں نائب صدر جے ڈی وینس، امریکی مذاکرات کار سٹیو وٹکوف اور ڈونلڈ ٹرمپ کے داماد جیرڈ کشنر پاکستان آئیں گے ۔
ایران کی نمائندگی وزیر خارجہ عباس عراقچی اور ایرانی پارلیمنٹ کے سپیکر باقر قالیباف کریں گے، پاکستان کی جانب سے مذاکرات میں وزیراعظم شہبازشریف، وزیر خارجہ اسحاق ڈار اور فیلڈ مارشل عاصم منیر حصہ لیں گے ۔
ذرائع کا کہنا ہے کہ مذاکرات سے قبل اسلام آباد میں تمام تیاریاں مکمل کی گئی ہیں اور شہر بھر میں سیکیورٹی کے سخت ترین انتظامات کئے گئے ہیں ۔
دریں اثنا وزیراعظم شہباز شریف نے مذاکرات کے مقام کا دورہ کیا، سیکیورٹی انتظامات کا جائزہ لیا اور متعلقہ حکام کو اہم ہدایات بھی جاری کیں ۔
اس سے قبل وفاقی وزیر داخلہ محسن نقوی سے امریکی ناظم الامور نیٹلی بیکر نے ملاقات کی، محسن نقوی نے کہا کہ امریکی نائب صدر جے ڈی وینس، سٹیو وٹکوف اور کشنر پاکستان کے خصوصی مہمان ہوں گے ۔
دوسری جانب ترجمان وائٹ ہاؤس کا کہنا ہے کہ بند کمروں میں حساس بات چیت ہوگی، ڈیل وہی کریں گے جو امریکہ کے بہترین مفاد میں ہوگا ۔
