خطے میں بڑھتی ہوئی کشیدگی کے خاتمے کیلئے پاکستان ایک اہم اور تاریخی کردار ادا کرنے کیلئے تیار ہے، جبکہ امریکہ اور ایران کی اعلیٰ قیادت کے درمیان اہم مذاکرات اسلام آباد میں ہو رہے ہیں
ذرائع کے مطابق امریکی نائب صدر جے ڈی وینس کی قیادت میں امریکی وفد آج رات اسلام آباد پہنچنے کا امکان ہے۔ وفد میں جیرڈ کشنر اور مشرقِ وسطیٰ کے خصوصی ایلچی اسٹیو وٹکوف بھی شامل ہوں گے۔
دوسری جانب ایرانی وفد کی نمائندگی پارلیمنٹ کے اسپیکر محمد باقر قالیباف اور وزیر خارجہ عباس عراقچی کریں گے، جو اہم امور پر بات چیت میں حصہ لیں گے۔
ذرائع کا کہنا ہے کہ امریکی وفد کی معاونت کیلئے 23 رکنی عملہ پہلے ہی اسلام آباد پہنچ چکا ہے، جس میں سفارتی اور سیکیورٹی ماہرین شامل ہیں تاکہ مذاکرات کو مؤثر اور محفوظ بنایا جا سکے۔
اسلام آباد عالمی سطح کے ان اہم مذاکرات کی میزبانی کیلئے مکمل طور پر تیار ہے۔ ایران کے سفارت خانے نے بھی پاکستانی حکام کے ساتھ وفد کی آمد اور انتظامات کے حوالے سے رابطے کیے ہیں۔
تجزیہ کاروں کے مطابق یہ مذاکرات خطے میں امن کے قیام اور کشیدگی میں کمی کیلئے نہایت اہم پیش رفت ثابت ہو سکتے ہیں، اور پاکستان ایک بار پھر عالمی سفارتکاری میں کلیدی کردار ادا کرنے کی پوزیشن میں ہے۔
