ضلع بٹگرام کی تحصیل آلائی کے علاقے بنہ میں گورنمنٹ پرائمری سکول بنہ کے زیر اہتمام یومِ قومی جنگلی حیات نہایت جوش و خروش سے منایا گیا۔ اس تقریب کا مقصد طلبہ اور عوام میں جنگلی حیات کے تحفظ اور قدرتی وسائل کی اہمیت کے حوالے سے شعور اجاگر کرنا تھا۔
تقریب میں طلبہ نے بھرپور شرکت کی اور جنگلی حیات کے تحفظ کے موضوع پر تقاریر اور اظہارِ خیال پیش کیا۔ ایک طالبعلم نے جنگلی جانوروں کی بقا اور ماحولیاتی توازن پر روشنی ڈالی، جبکہ ایک طالبہ نے یومِ جنگلی حیات کی اہمیت بیان کرتے ہوئے حاضرین کو قدرتی وسائل کے تحفظ کے لیے اپنا کردار ادا کرنے کی تلقین کی۔
اس موقع پر آلائی کی ادویاتی نباتات کی خصوصی نمائش بھی منعقد کی گئی، جس میں مقامی حکیم نے مختلف پودوں کے طبی فوائد اور استعمال کے حوالے سے معلومات فراہم کیں۔ نمائش کو شرکاء کی جانب سے بے حد سراہا گیا۔
تقریب کے مہمانِ خصوصی اسسٹنٹ کمشنر آلائی جناب عامر مصطفیٰ تھے، جن کے ہمراہ محمد سلیم خان (ممبر نیشنل جیوگرافی)، خطیب آلائی عنایت الرحمٰن، وائلڈ لائف ڈیپارٹمنٹ کے سرتاج خان، اساتذہ کرام اور دیگر معززین بھی موجود تھے۔
مقررین نے کہا کہ جنگلی حیات اور ماحول کا تحفظ ہم سب کی مشترکہ ذمہ داری ہے۔ انہوں نے زور دیا کہ نئی نسل میں ماحولیاتی شعور پیدا کیے بغیر پائیدار ترقی ممکن نہیں۔
تقریب کے اختتام پر اس عزم کا اعادہ کیا گیا کہ علاقے میں جنگلی حیات کے تحفظ اور قدرتی وسائل کی بقا کے لیے آگاہی مہم کا سلسلہ جاری رکھا جائے گا۔
