پاکستان کے مختلف شہروں میں رمضان المبارک 1447ہجری کا چاند نظر آگیا ہے، جس کے بعد ملک بھر میں پہلا روزہ کل بروز جمعرات ہوگا ، صدر مملکت، وزیراعظم اور خیبر نیٹ ورک انتظامیہ نے قوم کو رمضان کی آمد کے موقع پر مبارکباد دی ہے ۔
مرکزی رویت ہلال کمیٹی کا اجلاس چیئرمین عبدالخبیر آزاد کی زیر صدارت ہوا جس کے بعد انہوں نے اعلان کیا کہ ملک بھر میں پہلا روزہ کل جمعرات کو ہوگا ۔
مرکزی رویت ہلال کمیٹی کا اجلاس چارسدہ روڈ پر اوقاف ہال میں ہوا جبکہ زونل کمیٹیوں کے اجلاس اسلام آباد، کراچی، لاہور اور کوئٹہ میں ہوئے،مرکزی اجلاس میں کمیٹی کے ارکان، محکمہ موسمیات، سپارکو، وزارتِ سائنس اینڈ ٹیکنالوجی کے نمائندے شریک ہوئے ۔
چیئرمین رویت ہلال کمیٹی مولانا عبدالخبیرآزاد کا کہنا تھا کہ ملک بھر سے چاند کی 22 شہادتیں موصول ہوئیں، اہلِ وطن کو ماہ مقدس کی مبارک باد پیش کرتا ہوں، رمضان میں زیادہ سے زیادہ عبادت کریں، رمضان رحمتوں اوربرکتوں کا مہینہ ہے ۔
علاوہ ازیں مسجد قاسم علی خان میں غیرسرکاری رویت ہلال کمیٹی کا اجلاس بھی آج ہوا، غیرسرکاری رویت ہلال کمیٹی کے اجلاس کی صدارت مفتی شہاب الدین پوپلزئی نے کی ۔
دوسری جانب بنگلا دیش اور بھارت میں بھی رمضان المبارک کا چاند نظر آ گیا اور وہاں بھی کل جمعرات کو پہلا روزہ ہوگا ۔
جبکہ سعودی عرب، خلیجی ممالک اور افغانستان میں آج پہلا روزہ تھا، اسی طرح عراق، عمان، ترکیہ، انڈونیشیا، ملائیشیا میں پہلا روزہ کل ہوگا، جبکہ آذربائیجان، قازقستان، کرغزستان، ازبکستان میں پہلا روزہ جمعرات کو ہو گا ۔
صدر مملکت آصف علی زرداری، وزیراعظم شہبازشریف اور خیبر نیٹ ورک انتظامیہ اور کارکنوں نے قوم کو رمضان المبارک کی مبارکبارد دی ہے ۔
