آزاد جموں و کشمیر میں حالیہ شدید برفباری کے باعث جانی و مالی نقصان کی اطلاعات سامنے آئی ہیں۔ اسٹیٹ ڈیزاسٹر مینجمنٹ اتھارٹی (ایس ڈی ایم اے) نے نقصانات کی تفصیلات جاری کر دی ہیں۔
ایس ڈی ایم اے کے مطابق باغ میں لینڈ سلائیڈنگ کے نتیجے میں ایک شہری جاں بحق ہو گیا، جبکہ مختلف علاقوں میں برفانی تودے اور مٹی کے تودے گرنے کے واقعات پیش آئے۔
برفباری اور لینڈ سلائیڈنگ کے باعث 11 گھر مکمل طور پر تباہ ہو گئے، جبکہ 8 مکانات کو جزوی نقصان پہنچا ہے۔
شاہراہوں کی صورتحال کے حوالے سے بتایا گیا ہے کہ دارالحکومت مظفرآباد سے پیر چناسی جانے والی سڑک برفباری کے باعث بند ہے، جبکہ مظفرآباد سے وادی نیلم کی شاہراہ شاردہ تک بحال کر دی گئی ہے۔
بلند و بالا علاقوں اور نیلم ویلی کی بند شاہراہوں کی بحالی کا کام تیزی سے جاری ہے۔ ہٹیاں بالا سے وادی لیپہ جانے والی سڑک داوکھن تک بحال کر دی گئی ہے۔
ایس ڈی ایم اے نے برفباری اور پھسلن کے باعث شہریوں کو غیر ضروری سفر سے گریز کرنے کی ہدایت کی ہے، جبکہ اندرون وادی لیپہ اور دیگر بالائی علاقوں میں بند شاہراہوں کی بحالی کا عمل جاری ہے۔
