خیبرپختونخوا کے دو اضلاع بنوں اور کرک میں دہشت گردوں کے حملے ناکام بنا دیئے گئے، پولیس حکام کے مطابق کارروائی میں 3 دہشتگرد ہلاک جبکہ 4 زخمی ہو گئے، دہشتگردوں کی فائرنگ سے 3 پولیس اہلکار بھی معمولی زخمی ہوگئے ۔
بنوں: ریجنل پولیس آفیسر سجاد خان کے مطابق بنوں میں دہشت گردوں نے پہلے میریان تھانے اور پھر مزنگ چوکی کو نشانہ بنایا تاہم پولیس نے دلیری اور حکمت عملی سے دونوں حملے پسپا کر دیئے ۔
پآر پی او کا کہنا ہے کہ دہشت گردوں نے میریان تھانے پر حملہ کیا جسے 20 منٹ میں ناکام بنا دیا گیا، میریان میں مزنگ چوکی پر بھی درجنوں دہشت گردوں نے بھاری ہتھیاروں سے حملہ کیا جہاں فائرنگ کا سلسلہ ایک گھنٹے تک جاری رہا ۔
انہوں نے کہا کہ پولیس نے 3 دہشت گردوں کو ہلاک جبکہ 4 کو زخمی کردیا، دہشت گردوں کے ساتھی ہلاک اور زخمیوں کو لے کر فرار ہوگئے جبکہ حملے میں 3 پولیس اہلکار معمولی زخمی ہوئے ہیں ۔
اس کے علاوہ کرک کے گُرگُری تھانے پر بھی دہشت گردوں نے حملہ کیا تاہم اس دوران پولیس اور دہشت گردوں میں فائرنگ کا تبادلہ ہوا، ڈی پی او کرک کے مطابق دہشت گردوں کو تھانے کے قریب نہیں آنے دیا گیا ۔
