ویسٹ انڈیز نے دوسرے ون ڈے میں پاکستان کو شکست دے کر سیریز 1-1 سے برابر کر دی، پاکستان کے 181 رنز کا ہدف میزبان ٹیم نے با آسانی 34 ویں اوور میں 5 وکٹوں کے نقصان پر حاصل کرکے کامیابی حاصل کی ۔
ٹرینیڈاڈ : 3 ون ڈے میچز کی سیریز کے دوسرے میچ میں میزبان ویسٹ انڈیز نے پاکستان کے خلاف ٹاس جیت کر فیلڈنگ کا فیصلہ کیا ۔
پاکستان کی اننگز بارش کی وجہ سے 3 مرتبہ روکی گئی، بعد ازاں قومی ٹیم کی اننگز کو 37 اوورز تک محدود کیا گیا، بارش سے متاثرہ میچ میں گرین شرٹس نے مقررہ اوورز میں 7 وکٹ پر 171 رنز بنائے، تاہم ڈرک ورتھ لوئس میتھڈ کے تحت ویسٹ انڈیز کو 35 اوورز میں 181 رنز کا ہدف ملا ۔
پاکستان کی جانب سے صائم ایوب نے23، عبداللہ شفیق 26، بابر اعظم صفر، محمدرضوان 16، سلمان آغا 9 ،حسین طلعت 31 جبکہ حسن نواز 36 رنز اور شاہین آفریدی 11 رنز بنا کر ناٹ آؤٹ رہے ۔
ویسٹ انڈیز کی جانب سے جیڈن سیلز نے 3 ، روسٹن چیز، ،گوداکیش موتی، شمار جوزف اور بلیڈز نے ایک ایک وکٹ حاصل کی ۔
ویسٹ انڈیز نے پاکستان کا 181 رنز کا ہدف با آسانی 34 ویں اوور میں 5 وکٹوں کے نقصان پر حاصل کرلیا، روسٹن چیز 49 رنز اور جسٹن گریوز 26 بناکر ناقابل شکست رہے، رتھرفورڈ 45، شائے ہوپ 32 اور کارٹے 16 رنز بناسکے ۔
پاکستان کی جانب سے حسن علی اور محمد نواز نے 2،2 جبکہ ابرار احمد نے ایک کھلاڑی کو آؤٹ کیا، ویسٹ انڈیز نے میچ جیت کر تین میچوں کی سیریز ایک، ایک سے برابر کردی ۔
پاکستان ٹیم میں ادوسرے میچ کیلئے تین تبدیلیاں کی گئیں، حسن علی، محمد نواز اور محمد ابرار کو شامل کیا گیاجبکہ فہیم اشرف، سفیان مقیم اور نسیم شاہ پلیئنگ الیون میں شامل نہیں تھے ۔
واضح رہے کہ سیریز کے پہلے میچ میں پاکستان نے ویسٹ انڈیز کو 5 وکٹوں سے شکست دی تھی، تیسرا اور فیصلہ کن میچ کل کھیلا جائے گا ۔
