ہری پور محرم الحرام کے دوران امن وامان برقرار رکھنے کیلئے سکیورٹی پلان جاری کردیا گیا ہے ،پولیس حکام کے مطابق محرم کے دوران 1800 سے زائد پولیس افسران و جوان سکیورٹی ڈیوٹی کے فرائض سرانجام دیں گے ۔
ڈی پی او ہری پور فرحان خان کے مطابق یکم محرم الحرام سے لے کر 10 محرم الحرام تک ضلع ہری پور میں کل 35 جلوس اور 210 کے قریب مجالس کا انعقاد ہوگا ۔
انہوں نے کہا کہ تمام جلوسوں،مجالس اور امام بارگاہوں کی سیکورٹی کے لئے1800 سے زائد افسران اور جوان تعینات کیے گئے ہیں۔ تمام کیٹگری کے جلوسوں کے لئے سیکورٹی کے فول پروف انتظامات عمل میں لائے گئے ہیں ۔
ان کا کہنا تھا کہ اشتعال انگیز تقاریر، اسلحہ کی نمائش، وال چاکنگ اور لاؤڈسپیکر کے استعمال پر مکمل پابندی عائد ہے ، ضلعی انتظامیہ کی جانب سے دفعہ 144 کا نفاز بھی عمل میں لایا گیا ہے ،ضلع کے داخلی و خارجی راستوں پر چیکنگ کا عمل سخت کردیا گیا ہے ۔
محرم الحرام کے مرکزی جلوسوں کے دنوں میں ٹریفک کی روانی کو برقرار رکھنے کے لئے متبادل ٹریفک پلان بھی جاری کردیا گیا ہے، کسی بھی ناخوشگوار واقع سے نمٹنے کے لئے پولیس لائن ہری پور میں پولیس کی ریزرو نفری بھی تعینات کی گئی ہے ۔
ڈی پی او ہری پور نے عوام کے نام پیغام میں کہا کہ پر امن محرم الحرام کے انعقاد کے لیے ہری پور پولیس اور ضلعی انتظامیہ کا ساتھ دیں ۔سوشل میڈیا پر فرقہ وارانہ پوسٹ شہیر نہ کریں ۔
