آئی ایس پی آر کی جانب سے جاری بیان کے مطابق سیکیورٹی فورسز نے خیبرپختونخوا کے مختلف علاقوں میں چار کارروائیوں کے دوران 11 دہشتگردوں کو ہلاک کردیا ۔
خیبر پختونخوا کے مختلف علاقوں میں 26 اور 27 مارچ کو سیکیورٹی فورسز کی چار الگ الگ آپریشنز کئے،یہ کارروائیاں دہشتگردوں کی موجودگی کی خفیہ اطلاع پر کی گئیں ۔
ترجمان پاک فوج کے مطابق شمالی وزیرستان کے علاقے میر علی میں انٹیلی جنس بنیادوں پر آپریشن کیا گیا، جس میں سیکیورٹی فورسز نے دہشتگردوں کے ٹھکانے کو مؤثر انداز میں نشانہ بنایا اور آپریشن کے نتیجے میں 5 دہشتگرد ہلاک ہو گئے ۔
آئی ایس پی آر کے مطابق اسی علاقے میں دوسری کارروائی میں مزید 3 دہشتگردوں کو کامیابی سے انجام تک پہنچایا گیا، شمالی وزیرستان کے علاقے میران شاہ میں ہونے والے ایک اور مقابلے میں سیکیورٹی فورسز نے مزید 2 دہشتگردوں کو ہلاک کیا ۔
ترجمان کے مطابق چوتھی کارروائی ڈیرہ اسماعیل خان کے علاقے درابن میں کی گئی، آپریشن میں ایک دہشتگرد ہلاک ہوگیا ۔
آئی ایس پی آر کا مزید کہنا ہے کہ ہلاک دہشتگرد ملک میں مختلف دہشت گرد سرگرمیوں میں ملوث تھے، سیکیورٹی فورسز کی جانب سے علاقے میں کلیئرنس آپریشن جاری ہے ، تاکہ کسی بھی باقی ماندہ دہشتگردوں کو ختم کیا جا سکے ، پاک فوج ملک سے دہشت گردی کے ناسور کو جڑ سے اکھاڑنے کے عزم پر قائم ہے۔
دوسری جانب وزیراعظم محمد شہباز شریف کا ضلع شمالی وزیرستان کے علاقوں میر علی اور میران شاہ اور ضلع ڈیرہ اسماعیل خان کے علاقے درابن میں دہشت گردوں کے خلاف کامیاب کارروائیوں پر سیکیورٹی فورسز کو خراج تحسین پیش کیا ہے ۔
وزیراعظم نے آپریشنز میں 11 دہشت گردوں کو ہلاک کرنے پر سیکیورٹی فورسز کی ستائش کرتے ہوئے کہا کہ دہشت گردی کے خلاف جنگ میں پوری قوم سیکیورٹی فورسز کے ساتھ کھڑی ہے ۔
