نیوزی لینڈ نے پاکستانی ٹیم کو 5 وکٹوں سے شکست دے کر ہوم گراونڈ پر ہونے والی سہ ملکی سیریز جیت کر ٹرافی اپنے نام کرلی ،کراچی میں کھیلے گئے سہ ملکی سیریز کے فائنل میچ میں پاکستان کے 243 رنز کا ہدف نیوزی لینڈ نے 46 ویں اوور میں 5 وکٹوں کے نقصان پر پورا کرکے کامیابی حاصل کی ۔
سہ ملکی سیریز کے فائنل میچ میں پاکستان نے ٹاس جیت کر بیٹنگ کا فیصلہ کیا جو درست ثابت نہ ہو سکا ، پاکستان کی جانب سے اننگز کا آغاز مایوس کن رہا اور فخر زمان 10 رنز بنا کر آؤٹ ہوگئے، اس کے بعد سعود شکیل 8 اور بابر اعظم 29 رنز بناکر پویلین لوٹے ۔
محمد رضوان اور سلمان نے ایک بار ہمت کی لیکن بڑٰ اننگز کھیلنے میں وہ بھی ناکام رہے ، دونوں نے 88 رنز کی پارٹنرشپ کی تاہم کپتان 46 اور نائب کپتان 45 رنز بنا کر آؤٹ ہوئے ، طیب طاہر نے بھی 38 رنز بنائے لیکن بعد میں آنے والے بھی سکور کو 242 تک ہی پہنچا پائے ۔
پاکستان کی پوری ٹیم آخری اوور میں 242 رنز بناکر آؤٹ ہوگئی، نیوزی لینڈ کے ول اورورکی نے چار، بریس ویل اور سینٹنر نے 2،2 کھلاڑیوں کو آوٹ کیا ،پاکستان کے 243 رنز ہدف کے تعاقب میں نیوزی لینڈ کا آغاز بھی کچھ خاص نہ تھا اور دوسرے اوور میں ول ینگ 5 رنز بنا کر نسیم شاہ کا شکار بنے ۔ اس کے بعد دوسری وکٹ پر کین ولیمسن اور کونوے نے ذم دارانہ بیٹنگ کی تاہم 76 کے مجموعی سکور پر کین ولیمسن 34 رنز بناکر بولڈ ہوگئے جبکہ کونوے بھی 48 رنز بناکر یویلین لوٹ گئے ۔
مچل اور لیتھم نے بھی شاندار اننگز کھیلیں اور ٹیم کی کامیابی میں اہم کردار ادا کیا، ٹام لیتھم 57 اور ڈیرل مچل 56 رنز بنا کر آؤٹ ہوئے ،نیوزی لینڈ نے 46 ویں اوور میں 5 وکٹوں کے نقصان پر ہدف حاصل کرلیا اور یوں سہ فریقی سیریز میں گرین شرٹس کو شکست دے کر ٹرافی اپنے نام کرلی ۔
پاکستان کی جانب سے نسیم شاہ نے 2، شاہین شاہ آفریدی، ابرار احمد اور سلمان علی آغا نے ایک ایک وکٹ حاصل کی ،آخر میں نیوزی لینڈ کے ول اورورکی کو 4 وکٹیں لینے پر پلیئر آف دی میچ جبکہ پاکستان کے سلمان علی آغا کو سیریز میں 219 رنز بنانے پر پلیئر آف دی سیریز کا ایوارڈ دیا گیا ۔
