گورنر گلگت بلتستان سید مہدی شاہ نے جشن آزادی پولو ٹورنامنٹ میں شریک تمام پولو ٹیموں کے کھلاڑیوں کے اعزاز میں ایک عشائیے کا اہتمام کیا، جس میں چترال کے کھلاڑیوں نے بھی شرکت کی۔
اس موقع پر گورنر گلگت بلتستان نے کہا کہ جی بی اور چترال کے درمیان کھیلوں کے میدان سمیت دیگر شعبوں میں بہترین تعاون کو فروغ دینا انتہائی ضروری ہے۔
مہدی شاہ نے کہا کہ اس طرح کے ٹورنامنٹس کی وجہ سے نہ صرف کھلاڑیوں کو اپنی صلاحیتوں کے اظہار کا موقع ملتا ہے بلکہ دونوں علاقوں کے لوگوں کے مابین محبت اور بھائی چارے کو بھی تقویت ملتی ہے ۔
گورنر گلگت بلتستان نے امید ظاہر کی ہے کہ آنے والے وقتوں میں بھی اس طرح کے مقابلے دونوں علاقوں کے درمیان تعلقات کو مزید تقویت دیں گے۔
