کوئٹہ: ژوب سے مبینہ طور پر اغواء ہونے والے ساتویں جماعت کے طالب علم بریال خان مندوخیل کو کوئٹہ پولیس نے بحفاظت بازیاب کروا لیا.
اغواء کے الزام میں تین ملزمان کو گرفتار کرلیا گیا ہے۔
بازیاب طالب علم اور گرفتار ملزمان کو سخت سیکیورٹی حصار میں کوئٹہ سے ژوب منتقل کر دیا گیا۔
پولیس کے مطابق 14 سالہ طالب علم بریال خان مندوخیل کو ژوب سے مبینہ طور پر اغواء کیا گیا تھا
یہ واقعہ سوشل میڈیا پر بھی وائرل ہوگیا۔
وزیر اعلیٰ بلوچستان میر سرفراز بگٹی کی خصوصی ہدایت پر طالب علم کی بحفاظت بازیابی کے لیے خصوصی ٹیمیں تشکیل دی گئی تھیں۔
ایس ایس پی آپریشنز کوئٹہ ضیاء مندوخیل کی نگرانی میں پولیس نے کارروائی کرتے ہوئے مغوی طالب علم کو بحفاظت بازیاب کروایا۔
پولیس کے مطابق کارروائی کے دوران صابر شاہ ولد فضل شاہ، عبدالسلام ولد ماشو اور انعام اللہ ولد بسم اللہ کو گرفتار کیا گیا۔
بازیاب طالب علم اور تینوں گرفتار ملزمان کو سخت سیکیورٹی میں کوئٹہ سے ژوب پہنچا دیا گیا ہے۔
پولیس کا کہنا ہے کہ ژوب پہنچنے کے بعد واقعے کی مزید تفتیش اور قانونی کارروائی جاری ہے۔
گرفتار ملزمان سے مبینہ اغواء کے حوالے سے مزید پوچھ گچھ کی جا رہی ہے۔
