وزیراعلیٰ کے پی علی امین گنڈا پور کی نااہلی کے لئے ایڈووکیٹ عزیز الدین کاکا خیل کی جانب سے پشاور ہائیکورٹ میں درخواست دائر کردی گئی۔
ذرائع کے مطابق ،علی امین گنڈا پور کی نااہلی کی درخواست ایڈووکیٹ عزیز الدین کاکا خیل کی جانب سے پشاور ہائی کورٹ میں دائر کی گئی، درخواست میں وزیراعلیٰ خیبر پختونخوا علی امین گنڈا پور کے علاوہ وفاقی و صوبائی حکومت، گورنر اور دیگر کو بھی فریق بنایا گیا ہے۔
ذرائع کے مطابق درخواست میں یہ مؤقف اختیار کیا گیا ہے کہ وزیراعلیٰ علی امین گنڈا پور نے اپنے حلف کی خلاف ورزی کی، اور علی امین گنڈا پور نے جلسوں کے لیے سرکاری وسائل استعمال کیے، وزیراعلیٰ کے منصب پر فائز ہو کر سرکاری وسائل سیاسی مقاصد کے لیے استعمال نہیں کیے جا سکتے۔
رپورٹ کے مطابق پشاور ہائیکورٹ میں دائر درخواست میں مزید کہا گیا ہے کہ علی امین گنڈا پور نے وفاقی حکومت پر لشکر کے ساتھ چڑھائی کی، جو انتہائی تشویش ناک عمل ہےـ
درخواست گزار نے استدعا کی کہ وزیراعلیٰ خیبرپختونخوا علی امین گنڈا پور کو آرٹیکل 62 کے تحت نااہل کیا جائے، درخواست میں وزیراعلیٰ کو کام سے روکنے کے لیے بھی درخواست کی گئی ہے۔
