حویلیاں تھانہ حویلیاں کی حدود میں واقع گاؤں تنکی میں خونریز فائرنگ کے واقعے میں دو افراد جاں بحق اور تین شدید زخمی ہو گئے۔ واقعہ کی وجہ سابقہ دشمنی بتائی جا رہی ہے۔پولیس کے مطابق تنکی روڈ پر ایک کیری ڈبہ کو اس وقت نشانہ بنایا گیا جب وہ معمول کے مطابق گاؤں کی طرف جا رہا تھا۔ فائرنگ کے نتیجے میں سلیم ولد شیر زمان اور شانی ولد خان افسر موقع پر ہی دم توڑ گئے، جبکہ تین افراد شدید زخمی ہو گئے۔
اطلاع ملنے پر پولیس فوری طور پر موقع پر پہنچی، لاشوں کو اپنی تحویل میں لے کر پوسٹ مارٹم کے لیے ٹائپ ڈی ہسپتال حویلیاں منتقل کیا، جبکہ زخمیوں کو طبی امداد فراہم کی جا رہی ہے۔پولیس کا کہنا ہے کہ ابتدائی تفتیش کے مطابق واقعہ پرانی دشمنی کا نتیجہ ہے۔ ایک سال قبل بھی فریقین کے درمیان قتل و مقاتلہ کا واقعہ پیش آ چکا ہے۔ واردات کے بعد ملزمان موقع سے فرار ہو گئے، جن کی گرفتاری کے لیے چھاپے مارے جا رہے ہیں۔
