بھارتی بزدلانہ جارحیت کے دوران زخمی ہونے والے پاک فوج کے مزید 2 بہادر سپوت شہید ہوگئے، آئی ایس پی آر کے مطابق بھارتی حملوں کے دوران مسلح افواج کے شہید ہونے والے اہلکاروں کی تعداد 19 ہو گئی جبکہ 78 زخمی ہیں ۔
پاک فوج کے شعبہ تعلقات عامہ کی جانب سے جاری بیان میں کہا گیا ہے کہ بھارتی افواج نے 6 اور 7 مئی کی درمیانی شب بزدلانہ جارحیت کے دوران خواتین، بچوں اور بزرگوں سمیت معصوم شہریوں کو نشانہ بنایا، جس کے دوران مسلح افواج کے جوانوں نے بھرپور جذبے اور مثالی بہادری کے ساتھ مادر وطن کا دفاع کیا ۔
ترجمان پاک فوج نے کہا کہ اس دوران زخمی ہونے والے وطن کے مزید 2 بہادر سپوت دوران علاج شہادت کے رتبے پر فائز ہوگئے، جس کے بعد مسلح افواج کے شہید اہلکاروں کی کل تعداد 13 ہو گئی جبکہ 78 فرائض کی انجام دہی کے دوران زخمی ہوئے ۔
آئی ایس پی آر نے کہا کہ شہید ہونے والوں میں پاک فوج کے حوالدار محمد نوید شہید اور پاک فضائیہ کے سینئر ٹیکنیشن محمد ایاز شہید شامل ہیں، جن کی عظیم قربانی ان کی ہمت، فرض سے لگن اور غیر متزلزل حب الوطنی کا لازوال ثبوت ہے ۔
ترجمان پاک فوج کے مطابق پاکستان کی مسلح افواج پاکستان کے عوام کے ساتھ ملکر ان بہادر شہداء کو خراج عقیدت پیش کرتی ہے اور سوگوار خاندانوں سے دلی تعزیت کا اظہار کرتی ہے ۔
آئی ایس پی آر نے کہا کہ حملے میں زخمی ہونے والے تمام افراد کی جلد اور مکمل صحت یابی کے لئے بھی دعا گو ہے، شہداء کی یہ قربانی ہمیشہ قوم یاد رکھے گی، پاکستان زندہ باد – افواج پاکستان پائندہ باد ۔
دوسری جانب صدر آصف علی زرداری نے بھارتی جارحیت کے نتیجے میں مسلح افواج کے 2 زخمی جوانوں کے انتقال پر اظہارِ تعزیت کیا اور پاک آرمی کے حوالدار محمد نوید شہزاد اور پاک فضائیہ کے سینئر ٹیکنیشن محمد ایاز کے جاں بحق ہونے پر گہرے دکھ اور افسوس کا اظہار کیا ۔
صدر مملکت نے حوالدار محمد نوید شہزاد اور سینئر ٹیکنیشن محمد ایاز کی وطن کیلئے خدمات، عظیم قربانی پر انہیں خراجِ عقیدت پیش کیا اور کہا کہ ہمارے شہداء ہمارا اثاثہ ہیں، انکی قربانیوں کو فراموش نہیں کریں گے ۔
