تورغر میں دریائے سندھ پر شانگلہ دیدل کماچ جانے والی لفٹ فنی خرابی کے باعث دریا کے عین وسط میں پھنس گئی، چیئر لفٹ میں 7 افراد سوار ہیں ۔
ڈی سی تورغرصفدراعظم قریشی کے مطابق ریسکیو ٹیم اور مقامی لوگ پہنچ گئے، لفٹ میں پھنسے افراد کو بحفاظت نکالنے کیلئے آپریشن شروع کردیا گیا ، پھنسے افراد کو بحفاظت ریسکیو کیا جائے گا ۔
ضلعی انتظامیہ کے مطابق لفٹ رسی ٹوٹنے کے سبب درمیان مین پھنس گئی ہے ، ریسکیو1122 سمیت مقامی ماہر لوگ پھنسے افراد کو نکالنے کیلئے کوششیں کر رہے ہیں ۔
دوسری جانب واقعے کی اطلاع ملتے ہی ممبر صوبائی اسمبلی لائق محمد خان نے فوری طور پر وزیر اعلیٰ خیبر پختونخوا، علی امین گنڈا پور سے رابطہ کیا اور صورتحال سے آگاہ کیا ۔
وزیر اعلیٰ خیبر پختونخوا نے واقعے کا فوری نوٹس لیتے ہوئے ریسکیو اداروں کو ہنگامی بنیادوں پر کارروائی کی ہدایات جاری کر دیں، ضلعی انتظامیہ اور ریسکیو 1122 سمیت دیگر متعلقہ ادارے فوری طور پر حرکت میں آ گئے ۔
