صوابی میں جلسے سے خطاب میں پی ٹی آئی خیبرپختونخوا کے صدر جنید اکبر نے کہا ہے کہ وہ یہ بات واضح کرنا چاہتے ہیں کہ اداروں اور عوام میں فاصلے بڑھ رہے ہیں، ہم ان اداروں کو اپنا مانتے ہیں ، آپ کے اور عوام کے درمیان فاصلے ہیں جو ملک کے لیے بھی خطرناک ہے اور آپ کے لیے بھی ۔
جنید اکبر نے کہا کہ ہم نہیں چاہتے کہ اداروں سے ہمارا ٹکراؤ ہو کیونکہ یہ ادارے ہمارے ادارے ہیں، اس بار عمران خان جب بھی کال دیں گے پہلے سے زیادہ تعداد میں حاضر ہوں گے اور اس بار ہم گولیوں کی تیاری کے ساتھ آئیں گے ۔
انھوں نے کہا کہ اس بار جب بھی آئے پہلے سے زیادہ تیار ہو کے آئیں گے، ہمیں بھاگنے کے طعنے دینے والوں سے کہتا ہوں کہ ہمیں معلوم ہے کہ کون کون بھاگا ہے، کیونکہ یاسمین راشد سمیت کتنے قائدین گرفتار ہیں تو جب آپ انھیں نہیں توڑ سکے تو کیسے ہمارے کارکنوں کو توڑیں گے ۔
جنید اکبر کا کہنا تھا کہ تحریک انصاف کا ورکر نہ ڈرتا ہے نہ تھکتا ہے، مینڈیٹ چوری کرنے والوں کو بتانا چاہتا ہوں کہ گزشتہ سال بھی عمران خان کا مینڈیٹ تھا ، آج بھی ہے ۔
جلسے سے خطاب کے دوران وزیراعلیٰ علی امین گنڈاپور نے کہا کہ ہم ملک میں آئین و قانون کی بالادستی چاہتے ہیں، نظریہ کبھی مرتا نہیں، نہ ہی ختم ہو سکتا ہے، حکمرانوں سے مطالبہ ہے کہ اگر آپ نے نفرتیں بڑھائیں تو اس سے پاکستان کا نقصان ہے، فوج اور عوام میں فاصلہ مینڈیٹ چور حکومت بڑھا رہی ہے ۔
انھوں نے دعویٰ کیا کہ ہم عمران خان کی قیادت میں بڑھیں گے، عمران خان جیل میں بیٹھ کر جیت گیا ہے اورآپ لوگ ایوانوں میں بیٹھ کر بھی ہار گئے ہیں ۔
وزیر اعلیٰ خیبر پختونخوا علی امین گنڈاپور نے کہا ہے کہ اگر ہم نے بدلہ لینے کا سوچ لیا تو پھر ہمارے مخالفین برداشت نہیں کر سکیں گے۔ لیکن نفرتیں بڑھنے کا نقصان پاکستان کو ہو گا ۔
چیئرمین تحریک انصاف بیرسٹر گوہر نے صوابی جلسے سے خطاب میں کہا ہے کہ عمران خان کہہ چکے ہیں کہ وہ ملک کی خاطر مذاکرات کرنا چاہتے ہیں، ملک مشکل مرحلے پر کھڑا ہے اس کے لیے راستہ نکالنا ہو گا، پی ٹی آئی کا مینڈیٹ چوری نہیں کیا جا سکتا ۔
انھوں نے کہا کہ جتنے کیسز بنانے تھے بنا چکے جتنے نشانات لینے تھے لے چکے، عمران خان جلد عوام کے درمیان ہوں گے، کیسز بنانے والوں نے ہر حربہ کرکے دیکھ لیا لیکن عوام کے دلوں سے عمران خان کی محبت نہیں نکال سکے ۔
بیرسٹر گوہر نے کہا کہ پی ٹی آئی کے کارکنوں نے ایک سال بعد پھر تاریخ رقم کردی ہے، پاکستان کی سیاست عمران خان کے بغیر نہیں چل سکتی ۔
چیئرمین پی ٹی آئی کے مطابق عمران خان نے کہا ہے کہ ہم فوج کی قربانیوں کا برملا اعتراف کرتے ہیں، لیکن فوج اور عوام کے درمیان خلیج نہیں بڑھنی چاہیے، آج ملک بھر میں عوام احتجاج کررہے ہیں، یہ محب وطن ہیں، ان کی آواز کو سننا ہوگا ۔
پی ٹی آئی کے جلسے سے دیگر رہنماوں نے بھی خطاب کیا ،بعض رہنماوں کو خطاب کی دعوت بھی نہیں دی گئی ۔
