بھارت کی ریاست اترپردیش کے شہر علی گڑھ میں ایک انتہائی افسوسناک قسم کا واقعہ پیش آیا جدھر ایک پرائیویٹ اسکول کی ٹیچر نے 7 سال کے معصوم بچے کو بدترین تشدد کا نشانہ بنا ڈالا ہے۔
غیرملکی خبررساں اداروں کے مطابق ایک ٹیچر نے 7 سال کے بچے کو صرف اس وقت برہنہ کرکے مارا پیٹا جب وہ اپنا بیگ گھر میں بھول آیا،اور صرف اتنا ہی نہیں مبینہ طور پر ٹیچر نے بچے کو بجلی کے جھٹکے بھی دیے۔
رپورٹس کے مطابق جب بچہ روتا ہوا بری حالت میں واپس گھر پہنچا تو فوری طور پر اس کے والدین نے پولیس میں شکایت درج کروائی۔
غیرملکی خبررساں اداروں کے مطابق اس واقعے کے دن بچے کے والد شہر میں موجود نہیں تھے اور اس کی ماں کی طبیعت کافی ناساز تھی اس لیے اس کے دادا اسے اسکول لے کر گئے تھے۔
دوسری طرف متعلقہ اسکول کے پرنسپل نے ان الزامات کی تردید کرتے ہوئے یہ کہا کہ بچے کو بجلی کا جھٹکا لگانے والا الزام بالکل غلط ہے، ہم لوگ سی سی ٹی وی فوٹیج دکھانے کے لیے تیار ہیں۔
بھارتی میڈیا کے مطابق ٹیچر اور اسکول کے خلاف مقدمے کو درج کر لیا گیا ہے جبکہ اس کے ساتھ ہی پولیس نے تحقیقات کا آغاز بھی کردیا ہے۔
