الیکشن کمیشن نے اسلام آباد کی تینوں نشستوں پر کامیاب امیدواروں کا نوٹیفکیشن جاری کر دیا جبکہ راولپنڈی سمیت ملک کے دیگر شہروں کے حلقوں کے نتائج جاری نہ ہوسکے۔
این اے 46 سے پاکستان مسلم لیگ ن کے انجم عقیل کو کامیاب قرار دیا گیا ہے جبکہ این اے 47 سے ن لیگ کے ہی طارق فضل چودھری کامیاب قرار پائے ہیں۔اسلام آباد کے حلقہ این اے 48 سے آزاد امیدوار راجہ خرم شہزاد نوازکی کامیابی کا نوٹیفکیشن جاری کر دیا گیا ہے۔اس نوٹیفکیشن کے جاری کرنے کے بعد تین دن کے اندر آزاد امیدوار کو کسی سیاسی پارٹی سے وابستگی ظاہر کرنا ہو گی۔
واضح رہے کہ خرم نواز نے پہلے ہی ن لیگ میں شمولیت کا اعلان کر رکھا ہے۔ فارم 47 کے مطابق انجم عقیل حلقہ این اے 46سے اکیاسی ہزار نو سو اٹھاون ووٹ لے کر کامیاب رہے۔ این اے 47 میں ن لیگ کے امیدوار طارق فضل چودھری ایک لاکھ تیررہ سو ستاون ووٹ لے کر کامیاب ہوئے تھے ،اسلام آباد کے حلقہ این اے 48 سے آزاد امیدوار راجہ خرم شہزاد نوازانہتر ہزار نو سوانسٹھ ووٹ لے کر کامیاب ہوئے۔
